وحرض العزاب على الزواج ... يوميات عروس ...(1)

من طرف أبو علي السبت مايو 17, 2008 4:35 pm

...هذه قصة حقيقة وهي منقولة ...

الحلقة الأولى

يوم الزفاف

أخيرًا أصبحت في شقتي – عشي الصغير إحساس جميل أن يكون للبنت بيت خاص اختارت فيه كل ركن وكل جزء على ذوقها الخاص تفعل فيه ما تريد وتشعر بالفعل إنها ملكة متوجة – أخيرا انتهت الترتيبات والمشاوير والسهر والخناقات من اجل فرش هذا العش الرائع الصغير – أخيرا انتهى ضجيج الفرح وتفحص المعازيم في كأني هابطة من المريخ وكل واحدة من عواجيز الفرح تمصمص شفايفها وتقول ( مش كانت بنتي أحسن ؟ ) – تعبت جدا من حمل الفستان الثقيل والحذاء الضيق – سبحان الله هو كل أحذية العرايس بتكون ضيقة ليه ؟ وأخيرا أخيرا ح أكون لوحدي – أيه ده صوت عمر بيقول ( مدام عمر أجمعِ عندي بالخطوة السريعة ) !!! مدام ؟ أنا يا بيه ؟؟
- أيه يا ستِ سرحانة في أيه ده كله ؟؟! هو علشان مفيش حد في جمالك النهاردة يبقى خلاص ؟ لا يا هانم أنا لما انده عليكِ تيجي قبل ما انده مفهوم ؟ وبعدين فين القطة علشان اذبحها لكِ ؟!
- أنت عاوز تأكل قطط النهاردة ولا أيه ؟ لو ذبحتها ح اطبخها لك فورًا !!! .
- تطبخيها ؟!! بنات آخر زمن يعنى مش خايفة مني ؟
- لا مش خايفة ، فرحانة جدًا ، وأنت ؟
- أنا أسعد إنسان في الدنيا .... أول مرة بنتكلم أنا وأنتِ من غير ألف محرم وعزول في بيتنا الجميل بجد البيت رائع ، ذوقك طلع يجنن ... يا سارة لما كل حاجة أتفرشت وأجمل ما فيه أن حبيبتي فيه – لا لا مفيش كسوف خالص خلصنا الحدوتة ديه – شوفي أنا بأقول علشان ربنا يكرمنا في حياتنا نصلى أنا وأنتِ ركعتين نبدأ فيهم حياتنا علشان ربنا يبارك لنا كل خطوة ... ماشى ؟
سارة : ماشى يا حبيبي ......
- حبيبي ؟!! لا يا ستِ قومي غيري هدومك وتوضئي أحسن كده مش مصليين خالص !!!
قمت ودخلت حجرة النوم ولا أدرى عندما دخلتها لماذا ارتجفت ؟؟! الله يسامح كل البنات اللي رعبونا لما أتجوزوا ليه يعني هي حرب ؟ أنا مش ح أفكر في حاجة علشان ما اديهاش عياط من أولها ....
يا خبر أيه كل الجيبونات اللي في الفستان دى أنا كنت شايلة حديد زى المصارعين مش فستان ... لازم يعذبوا البنات في كل شيء والله حرام الغلب ده ... غيرت الفستان بأعجوبة وارتديت عباءة جميلة مطرزة ولم أجرؤ أن ارتدى الطقم الذي أوصتني أمي أن أرتديه ... العالم ديه بتهرج أكيد !!!
وتوضئت في حمام غرفة النوم وأزلت مكياج الفرح وأسدلت شعري ليراه عمر لأول مرة ، وخرجت له لأجده غير البدلة وارتدى البيجاما التي أوصاني العالم كله أن أهديها له وكأن الجوازة ستفشل لو لم تهدى العروس عريسها بيجاما يوم الزفاف ، وسيكتب الخبر في الصفحة الأولى ، وجدته ينظر لي نظرة كلها إعجاب وحب واستقبلني مهللاً ( أنا عرفت دلوقت ليه الحجاب فرض لو كنتِ بتخرجي بشعرك الجميل ده كانت حصلت مظاهرة ) يالا يا ستِ نصلى أحسن كده مش ح ينفع خالص .
وصليت وراء زوجي لأول مرة وأحسست إحساس رائع أن زوجي الإمام ، وأنَّ الله شاهد علينا ونحن نبتهل بين يديه أن يرزقنا السعادة والتوفيق ، ودعا عمر دعاء طويل وأمنت عليه وأنا أدعو من قلبي أن يحقق الله كل كلمة فيه ، وأن يكون زوجي الحبيب حبيبًا طوال العمر ، وألا يفرقنا إلا الموت وألا يدخل الشيطان بيننا أبدًا ......
وأنهينا الصلاة وجلسنا وأحتضن عمر يدي في يده لأول مرة !!! فارتجفت وظهر على ارتباكي وصاحبني خوفي !! ، واسترجعت كل الحكايات المفزعة التي سمعتها من أغلب البنات وواضح أن خوفي كان ظاهرًا عليّ وكأن عمر قرأ أفكاري فوجدته يحنو على ويقول: أيه يا سارة الرعب ده كله .. أيه يا حبيبتي هي حرب ؟! لا تخافي من أي حاجة خالص ، وسيبك من الأوهام ديه وحواديت البنات الفارغة ... لو كان الارتباط مفزع كده ما كانش – لم يكن - الإسلام سمى الليلة هذه ليلة البناء !! - يعنى الزوجين بيبنوا حياتهم في الليلة هذه - وكان سماها ليلة الحرب العالمية مش كده ويا ستِ علشان تطمئني أنا عاوز أتكلم معاكِ ، واستمتع أن أنا وأنتِ لوحدنا لأول مرة وبعدين كل حاجة تيجى على مهلها ماشي يا قمر ؟
سارة : أحسست بجبل أزيح من فوق صدري ، وشكرت تفهم عمر ورقته المتناهية وتحدثنا طويلاً طويلاً ، كأن طوال عمري لم أتحدث وكان أعذب حديث شعرت به في حياتي ، أتكلم مع زوجي حبيبي ، وفتحت له قلبي وسقط حاجز الخجل مني وفتحت قلبي ، وأخرجت كنز المشاعر التي كنت أخبؤها من يوم أن تشكلت أنثى إلى اليوم وأعطيتها إلى الرجل الذي ارتبطت به ، ووقتها عرفت عظمة الإسلام في تحريم العلاقات المحرمة والصحوبية ، وإلا كيف تشعر الفتاة بهذا الشلال من المشاعر الفياضة البكر ، لو كانت ألقت مشاعرها لهذا وذاك ووصلت إلى زوجها وهى مليئة بمرارات التجارب الفاشلة ؟؟!! ... وشيئًا فشيئًا سقطت الرهبة والحواجز بيننا ، وتحدثت القلوب ، والعيون ، و............. سكتت شهرزاد عن الكلام المباح ..... !!!!

إلى اللقاء في الحلقة القادمة ...

وكأني باللعاب قد سال لبعض القوم ...!!

من طرف أبوسعود السبت مايو 17, 2008 4:47 pm

نعم يا أبا علي نِعم التحريض هذا!!

من طرف gareeb الأحد مايو 18, 2008 8:36 am

الحقيقة أن القصة مشوقة ..
شكراً أبا علي ..
تألقٌ دائم ..

من طرف أبوسعود الأحد مايو 18, 2008 1:03 pm

ما شاء الله أبوفداغي أول العزاب رداً
ولعله لم يستطع التحمل
ليرد قبله عزابي آخر
فنسأل الله بأسمائه الحسنى وصفاته العلى
أن يكشف عنك الغمة ويعجل لك بالفرج
بزواج بأي طريقة كانت

من طرف gareeb الأحد مايو 18, 2008 5:21 pm

["أبوسعود"]

ما شاء الله أبوفداغي أول العزاب رداً
ولعله لم يستطع التحمل
ليرد قبله عزابي آخر
فنسأل الله بأسمائه الحسنى وصفاته العلى
أن يكشف عنك الغمة ويعجل لك بالفرج
بزواج بأي طريقة كانت

قاتل الله أمريكا ..
Very Happy

وش نسوي يابوسعود ..
مالنا إلا هالكتابة ..
نحط حيلنا به ..

من طرف أبو علي الأحد مايو 18, 2008 8:23 pm

البعض قد تثيره اللغة ... أكثر من أي شيء آخر ؟؟!!

أنا خايف على من في بريطانيا , لأن الوضع مفتوح , والرجال ما يوفر ,

لذا ياليت الشباب يناقشون حكم العــ.... ال.....ية

حتى تكون فَرَجاً ولو مؤقت للبعض

geek

من طرف أبوسعود الأحد مايو 18, 2008 8:32 pm

أبو علي الله يرضى عليك
لابغيت تنقل أقر زين
معقولة اللهجة شامية!!
كيف انقلبت لغة الصعيد إلى لغة شامية؟؟
لكن ما أقول ألا كما قال الإمام الشافعي رحمه الله:
ما رأيت سميناً فطيناً إلا محمد بن الحسن الشيباني

من طرف أبو علي الإثنين مايو 19, 2008 2:00 am

اعتذر فأنا قد سبق لفهمي ـ القاصر ـ أنها لغة شامية ...

ولن أذكر التبرير لذلك ...

وشكراً لمشرفنا النبيه

من طرف أبو علي الإثنين مايو 19, 2008 4:18 am

الحلقـة الثـانيـة
الصباحيّــة

قــالت ســارة : استيقظتُ من نومي وأنا لا أدري أين أنا .. وأخذتُ أتفحص المكان بدقة وأنا أبحث عن حجرتي القديمة فلا أجدها ، ووجدت عمر نائم على السرير فانتفضت وكدت اصرخ في وجهه.. ثم تذكرت كل شيء .. وأخذت أضحك في سرّي وأنا أتذكر أمي وهي تقول لي: أنتِ يا سارة لما بتصحي من النوم ممكن تطلبي البوليس للّي قدامك عقبال ما تعرفي أنتِ فين ؟!
عندها حق – أمي - لازم أتخلص من العادة ديه مش كل يوم ح أصحي الراجل مفزوع كده .
وأفقت لأجد أن جرس التليفون يرنّ منذ فترة ، وخرجت على أطراف أصابعي حتى لا أوقظ عمر ... ووجدتها ماما كما توقعت .. الحمد لله إنها لم تكن حماتي
ماما: صباح الخير يا ست العرايس .. صباحيّة مباركة .
أنا: صباح النور يا حبيبتي .
ماما: أنا لم أنم خالص قلقة عليكِ يا سارة ! .
أنا: الحمد لله كويسة - آه لو الأمهات تبطل القلق ده - .
ماما: طيب يا سارة إحنا ح نجيلك بعد الظهر شوية .
أنا: تنوّري يا ماما .

طبعًا ماما أُحبطت من ردي .. خلاص فعلا حاسة إن لي حياة مستقلّة ، وأني لستُ في حاجة ، إني أقول كل شيء لماما ... وبعدين عاوزة ماما تتعود على الوضع ده علشان ما يحصلش مشاكل بعد كده !! .
وضعت السماعة لأجد التليفون يرنّ مرة أخرى .. واضح إن تليفوننا هو الوحيد في مصر .. لأجد مكالمة مشابهة من حماتي وإنهم برضه ح ييجوا بعد الظهر
والدعوة عامة وحتبقى لمه !!

***********

استيقظ عمر وهو يبتسم ويقول: صباح الفل يا حبيبتي ، اهو ده الصباح ولاّ بلاش .. بجد ملكة حتى وأنتِ صاحية من النوم .
ابتسمتُ له وقلت أَسِّدّ نِفسه بسرعة فأخبرته أن كل العالم ح ييجيلنا بعد الظهر يعني بعد ساعة تقريباً .
ووجدته يقول: يا ستِ يشرّفوا ، بس بجد المفروض إن الأهل يسيبوا العرايس شوية يأخذوا على الوضع الجديد ، وعلى الحياة الجديدة مش هجوم كده من أولها.. ماهمّ لسه سايبنّا من كام ساعة .. حيكون حصل لنا أيه يعنى ؟ .. وبعدين أنا لم أنم طول الليل من شخيرك يا سارة – وجه مبتسم - شخيري !!! ؟
وكان ردي أن قذفته بكل خداديات الأنتريه ، ولقّنته درسًا لا ينساه في احترام حرمه المصون اللي هيّ أنا . ( ابتسامة ) .
عمـر: يا ستير يا رب ده أنتِ شرّانية أوي .. الواحد ما يعرفش يهزّر معاكِ شوية ؟
أنا: لا يا سيدي ما عندناش رجالة يهزروا .. يالاّ تعالى نشوف ح نقدم للجماعة أيه
، ودخلنا المطبخ وأعددنا ما سنقدمه للضيوف ، وأعدنا ترتيب المنزل علشان الناس اللي ح تيجي تتفرّج على الفرش الجديد ، وغيّرت ملابسي وارتديت طقم جديد وحذاء بكعب عالي لأول مرة وربنا يستر وأعرف امشي فيه !! ، وخلاص بقى سأعيش في دور المدام .. وجدت الباب بيرن ووجدت الأسرتين سوا مش عارفة أزاي ؟ !
لقيت نفسي مفروض أستقبل حوالي 18 فرد مرة واحدة .. ليه كده بس ؟
ما علينا .. المشكلة الأزلية إن الناس اللي بتيجي بتتفرّج على كل الشقة حتى المطبخ ، يعني المفروض أن أول ما الناس يشربوا حاجة أغسل الكاسات فوراً علشان الفرجة تبقى كاملة .
وهكذا لقيت نفسي تحولت إلى نحلة مكوكية أشيل ، وأحط – أضع - ، وأغسل وأفرّج الزباين !! اللي هما العائلتين يعني ..
أقصد الضيوف.. على الشقة حتة حتة .
ومش عارفة ليه العروسة بتفتح النيش والدواليب ، وكل الفرش ، وكل الأطقم لكل واحد ييجي ؟؟ .. فعلاً حرب المفروض الضيوف ييجوا يقعدوا في الصالون فترة بسيطة ويلقوا نظرة سريعة على الفرش ويباركوا ويمشوا وخلاص ، وبلاش التفتيش الذاتي ده ..
لكن تقول أيه الواحد كان أتجوز في الصين أحسن !

***********

قــال عمــر : أيه الشغلانة ديه ؟.. ده بيت أبويا ما كانش زحمة كده
الناس ديه ح تمشى متى ؟ !
أنا تعبت.. وسارة يا عيني ما قعدتش لحظة ، ولمّا جيت أشيل معاها الصواني ماما قالت
لي: يعني عمرك ما ساعدتني في البيت يا عمر ؟
الحمد لله إن سارة كانت في المطبخ مش ناقصين نكد .

***********

قــالت ســارة : وأخيراً أخيراً مشوا ، وأنا أكاد أبكي من التعب لأني أصلاً لسه تعبانة من مجهود الفرح .. حرام الظلم ده .
وجدت ماما تميل على وهيّ ماشية وتقول لي خلى بالك من نفسك يا سارة ، وما تتعبيش نفسك ( مش عارفة إزاى ؟ ).. وعلى فكرة خالك وخالتك وأولادهم جايين لكم بعد العصر شوية ، وعمة عمر وجوزها وأولادها جايين بالليل !!!!!!!!

حراااااااااااااام
***********

قــالت ســارة : يااااااه.. ديه فعلاً حرب .. أيه كل المهنئين دول أنا حاسة إني كنت عانس مثلاً !! ، ومصر كلها مش مصدقة أنى أتجوزت فجايين يتأكدوا بنفسهم أحسن تطلع إشاعة . !! .
ضيوف ضيوف ضيوف طول النهار والليل ومفروض أكون طول الوقت مستعدة ولابسة لبس في منتهى الشياكة ، وكعب عالي حتى لو لطعونا ساعتين ، أو ثلاثة . مش مهم ..
كعادة المصريين يقولوا لك: حنعدي عليك آخر النهار .... !!
الكلمة ديه بتثير جنوني .. يعني الساعة كام ؟ وطبعًا لازم البيت يبقى مفيش فيه ذرة تراب ، أو طبق في الحوض طوال اليوم علشان حملة التفتيش الذاتية ، وتكون النتيجة إننا مش عارفين نخرج ، ولا نتفسح ، ولا حتى الواحد يقعد على راحته حاجة تفلق !!

***********

قــال عمــر : هو الجواز ح يطلع مقلب ولا أيه يا رجالة ؟؟
أنا حاسس إني في الصين الشعبية .. رجالة وستات والكارثة في الأطفال اللي مش بيحلى لهم أكل الشيكولاتة ، ومسح أيديهم إلا في الصالون اللي الواحد دافع فيه دم قلبه !! ..
واللي يفرس ويغيظ أكتر موضوع الهدايا ده .. كل واحد جت له هدية مش عجباه ييجي ويديها لنا وطبعًا إحنا كمان مش محتاجينها ، وقليل جدًا الهدايا النقدية .. الواحد بقى على الحديدة من مصاريف الجواز والفرح وقلنا ستفرج من نقوط الفرح يقوموا يدوها هدايا مالهاش لازمة ؟ ده الواحد كده مش ح يعرف يعمل منظر في شهر العسل ولا أيه و مش ح اعرف أفسح سارة في مكان كويس ؟
شكلها كده ح ترسى على شقة خالي في إسكندرية مع سلفة مالية من أبويا لا ترد .. وربنا يستر وما تحصلش مشاكل

***********

قــالت ســارة : نقعت رجلي في ماء وملح من كثرة الوقوف ، وأخذت قرص مسكن وأنا أعاني من علامات كساح مبكر !! ... ونزعت فيشة التليفون كي لا يتصل أحد آخر ويتحفني بالخبر الميمون : إنه جاي في السكة .
وأغمضت عيني .. وجدت عمر يضع يده على جبيني ويقول لي : سلامتك يا حبيبتي من التعب.. معلش أنا ح أريحك حالاً.. يالاّ قومي رتبي الشنط سنسافر حالاً
رددت كالملسوعة: أيه .. أقوم ؟ .. وكمان نسافر حرام عليك أنا سأموت خلااااااااااص أنا مش ح أتحرك أبدًا من هنا .
عمـر: يا حبيبتي مفيش حل آخر .. أنا خلاص ح أتجنن من كثرة الدوشة ، لازم نهرب من هنا ، ونستمتع بشهر العسل أنتِ ناسية إننا ح نرجع شغلنا بعد أسبوع ؟
أنا: طيب والفلوس يا عمر ؟
عمـر: ولا يهمك يا حبيبتي جوزك اتصرّف .. جيب السبع ما يخلاش

أنا: طيب والناس اللي عمّالة تيجي دي حيتجي ما تلاقيناش ؟
عمـر: أحسن ... يبقوا يقعدوا مع البواب .. والله ده أنا مسافر مخصوص علشان أهرب منهم ونكون أنا وأنت بس في الدنيا .
أنا: طيب مش أستأذن ماما وبابا الأول ؟
فنظر إليَّ عمر بغضب هائل وقال لي: قومي لدوقتي يا سارة حضري الشنط حالاً سنسافر بعد ساعة .. قبل ما أفقد أعصابي .
فانتفضتُ من أمامهِ لأحضر الشنط فورًا وأنا لا أعرف ماذا أغضبه إلى هذا الحد..
علشان قلت أستأذن بابا طيب ما أنا لسه مش واخده على دور المدام ده .. واضح إني
متزوجة أسد ، وأنا مش واخدة بالي .
وفي السيارة أخذت بالي أني أول لأول مرة أركب مع عمر لوحدنا كان إحساس رائع والأجمل أنى تركته هو يقود الدفة ويوجهنا إلى حيث يشاء .
إحساس جميل بإلقاء المسئولية على الرجل وأنتِ تنعمي بالراحة والاطمئنان ... سبحان
الله حتى القوامة للرجل التي تغضب منها النساء ؛ ما أجملها من إحساس
وأغمضت عيني ونمت .. واستيقظت لأجد نسيم الإسكندرية الرائع ، وعمر يوقظني كطفلة صغيرة ويقول لي: قومي بقى يا عروسة .. وصلنا شقة خالي اللي حكيت لكِ
، عنها وصعدنا الشقة ووجدتها صغيرة ، لكن مشرقة وجميلة وأخذ عمر يفرجني على جميع الغرف وخرجنا البلكونة لنستمتع بمنظر البحر الرائع ولكني وجدت فتاة جميلة وجذابة ذات شعر حريري وقوام ممشوق في مثل سني تقريبًا في البلكونة المجاورة لنا تمامًا صاحت عندما رأت عمر وقالت بدلال كبير: حمد الله على السلامة يا عمر ، مش كنت تقول لي إنك قادم ؟.. كده أنا زعلانة منك ، ثم
انتبهتْ أخيراً إلى الحشرة الموجودة بجواره اللي هي أنا وقالت بتساؤل ممزوج بغضب: مين دي يا عمر ؟؟

إلى اللقاء في الحلقة التالية

!!

من طرف gareeb الإثنين مايو 19, 2008 10:40 am

أثر الجماعة ما من بعد عنا ..
الزورة هالظهرية والعصرية ..
بكل مكان ..
أحسنت أبوعلي ..
ممتعة ومشوقة هذه القصة ..

من طرف أبو علي الثلاثاء مايو 20, 2008 2:08 am

الحلقه الثالثه

قالت ساره

وقفتُ ارتجف من الغضب والدهشه والحيره من هذه التي جاءت لتهدم أحلامي في السعاده وتحادث حبيبي بكل هذا الدلال والذي يحمل في طيّاته الكثير من الذكريات المشتركه بينهما .. من أولها كده يا ربي ؟ لا اقدر حتى على المواجهه .. اشعر إن كلامي سيكون صراخاً .. وأنا لا أحب أن تسمع الأنسه المبجّله الملاصقه لنا إني أتشاجر معه بسببها فهي هكذا ستشعر بانتصار نظرتُ لعمر نظره ناريّه تحمل غضب العمر كله وتركته ودخلت لحجرة النوم ووجهي مشتعل من الغضب وأخذت اغرز أظافري في الوساده حتى كادت أن تتمزق من ضغط يدي وأنا أغالب الدموع بشده .. فتبعني عمر ووضع يده برقه على كتفي وقال لي بكل براءه : مالك يا ساره فيه حاجه ؟
فنظرتُ إليه نظره ناريه أخرى وأزحت يده من على كتفي وصرخت فيه : وكمان بتسأل مالِك ؟.. أنا اللي عاوزه اعرف مين الهانم دي وازاي تكلمك بالدلع ده كله ؟.. وإيه اللي كان بينك وبينها أو يمكن لحد دلوقتي كمان ؟
رد باستنكار : لحد دلوقتي ؟ حاسبي يا ساره انتي كده بتغلطي
قلت بعصبية : طب يا سيدي ما تزعلش .. إيه اللي كان بينك وبينها .. يالا احكيلي أنا نفسي أشوف فيلم رومانسي من زمان .. وأوعى تقولي مافيش حاجه .. من فضلك أنا مش طفله قدامك
رد برفق كأنه خائف على أن اموت من فرط ثورتي : طيب ممكن تهدّي نفسك علشان نعرف نتفاهم ؟
رددت وأنا ارتجف : مش حاهدى الا لما تقول لي كان فيه حاجه ولاّ لأ ؟
صمتَ طويلا قبل أن يجيب بصوت لا يُسمع : أيوه كان فيه
انهرتُ عندما سمعت هذه الكلمه الكريهه وتمنيت ساعتها لو كان كذب عليّ أو أنكر أو فبرك لي أي حكايه .. وأنا كي أُرضي غروري الأنثوي سأبتلعها .. لكن أن يعترف أمامي هكذا .. ولم استطع أن أواصل التفكير أكثر فانهارت دموعي بلا توقف أخذني عمر بين أحضانه وهو يهدهدني كطفل صغير يرفض النوم .. وقال لي : الحمد لله .. أنا عرفت دلوقتي حاجتين .. انك مجنونه وعرفت انك بتحبيني جداً .. والا إيه لازمة الجنان اللي انتي عاملاه ده ؟
وهممت أن أرد ولكن أغلق فمي بيده وهو يقول : بصّي يا ساره لغة الصراخ دي مش حاتوصّل لحاجه أبداً أنا حاقول لك على كل حاجه بس لما تهدي الأول خلاص ؟
مسحتُ دموعي كالأطفال وأنا أقول : اتفضل احكي بس إياك تكدب
مسح دموعي هو أيضاً برفق وقال لي : يا حبيبتي ما كنت كذبت من الأول وخلصت من الفيلم ده وضحكت عليكي وخلاص .. بصي يا ستي .. انتي عارفه إن دي شقه خالي من زمان جداً .. ومن و احنا أطفال و احنا بنيجى نصيف هنا وساعات نقضي بالشهرين هنا .. وانتي شايفه إن الشقق لازقه في بعض وطبيعي جداً حايكون لينا علاقه بالجيران .. وشيرين يا ستي بنت الدكتور محمود جارنا خريجه ألسن وخريجه مدارس لغات وبنت مثقفه وجميله زى ما انتي شفتي
قلتً بعصبيه : من فضلك بلاش الغزل ده قدامي .. انتوا متفقين عليّا ولا إيه ؟
فقال لي : لا يا حبيبتي ده انتي حبي وعمري كله والله .. المهم أنا يا ستي حسيت في فتره من الفترات إني ميّال لها وهي كمان بادلتني نفس الشعور بس عمري ما حسيت انه حب مكتمل .. كل ما ك نت آجي أخد خطوه ارجع خطوتين .. حتى انى لم أصارحها ابداً بحبي لأني ما تأكدتش ابدأ من مشاعري تجاهها ولم تُشعرني هي ابدأ بالاستقرار
لا أدري لماذا وقتها بعدت الغيره الحارقه قليلاً .. وشعرتُ إني أُحادث صديقاً يقص على مشكله وليس زوجي .. وسألته : ليه .. كانت إيه المشكله بينكم ؟
قال : المشكله كانت جرأتها الشديده وإنها دائماً مقتحمه وتكلم أي شاب أو رجل بمنتهى البساطه والود ولو ما كنتش عارف أخلاقها وتربيتها وأسرتها كنت شكّيت في أخلاقها .. ولكن تكويني كرجل شرقي متديّن ماقدرتش إني اقبل وضع زي ده وكلمتها عده مرات ولكن بلا فائده فثقافتها وطريقه دراستها وتربيتها المميزه تجعلها شديده الثقه بنفسها حتى لا ترى أن حاجز الحياء في الفتاه له مبرر .. وهكذا أخذت قرار نهائي بالابتعاد وخاصة إنني لم اكلمها في شيء صريح عن مشاعري وابتعدت عن هذه الشقه لمده عامين حتى لا أراها .. ودخلتها فقط في شهر العسل اللي حبيبتي عاوزه تقلبه غم
هدئتْ دموعي وأنا أشعر بحرارة صدق كلامه لأنه لم يكن مضطر أن يخبرني كل هذه التفاصيل لو لم يكن صادقاً وسألته : طيب يعني حبيتها بجد ؟
أجاب بسرعه : لا والله .. بجد كان مجرد انجذاب مش حب .. والا كنت اتغاضيت عن عيوبها وخطبتها.. أنا ما حبتش في حياتي الا مجنونه واحده عمّاله تعيّط زي الأطفال
سألته : أمال بتكلّمك كده ليه زي ما تكون مراتك وقفشتك مع واحده تانيه ؟
رد عليّ قائلاً : يا حبيبتي ما هي اسلوبها كده .. أعملّها إيه يعني ؟.. خلاص بقى يا ساره هو احنا نخلص من الضيوف تطلع لنا الست هانم دي ؟.. سبحان الله ده أنا سمعت عن شهر العسل ده حواديت ألف ليله وليله .. واضح انك اخدت مقلب يا واد يا عمر .. يا ريتك كنت أتجوزت شيري
اغتظت من الكلمه فقلت : شيري ؟! طيب روح لها بقى يا أخويا خليها تنفعك
وأخذتُ أدفعه خارج الحجره وأغلقتُ الباب على نفسي من الداخل وأنا أشعر أن جبل قد أزيح من على صدري واني ضخمت الموضوع بغباء قبل أن اعرف الحقيقه .. كم هي قاسيه الغيره وكم أعشق هذا الرجل الأسمر بجنون
وفي الخارج كان عمر يدق على الباب وينادي : افتحي يا ساره الله يهديكي .. يا بنتي افتحي أنا تعبت .. طيب علشان خاطري .. ده الضيوف أهون يا شيخه .. يا مجنونه افتحي .. طيب يا ساره خلاص براحتك أنا حانزل شويه بس خلّي بالك الأوضه اللي انتي فيها دي كان دايماً فيها فار !!!.. باي يا حبيبتي بقى
وطبعا فتحت الباب كالملسوعه وأنا اصرخ : فاااااااااار ؟.. وأجرى كي ألحق عمر قبل أن يتركني مع الفار وحدي نقضي شهر العسل سوياً !! وخطوت خطوه واحده .. وجدت نفسي بين ذراعيه وهو يضحك ولم أستطع الهرب ولا الكلام وسكتت شهرزاد عن الكلام المباح

************************************

من طرف ابوعمار الأربعاء مايو 21, 2008 11:18 am

السؤال اللي يطرح نفسه هل يبقى الكلام المعسول هذا أم يتلاشى مع الوقت ويعود الروتين وتصبح وكأنها في بيت أمها!!!

وبعدين غريبه هالمصريين شكلهم من نجد ،، ما تفسحوا قبل الخطوبه عشان يعرفوا بعض أكتر ولا إيه ؟؟!!

من طرف أبوسعود الأربعاء مايو 21, 2008 12:13 pm

تباً لكم يا أعداء المرأة وسحقاً
لماذا تحاولون تثبتون أن الكلام المعسول يذهب بعد ملل المرأة من زوجها
يكفي ترى أمك واختك نساء ؟؟؟

من طرف أبو علي الأربعاء مايو 21, 2008 1:47 pm

الحلقه الرابعه

قال عمر

الحمد لله إني لم أتزوج واحده مجنونه تخنقني بغيرتها وخناقها وعصبيتها .. فعلاً الثقافه والقراءه بتفرق جداً في عقليه البنت .. لو كانت ساره واحده دماغها فاضيه من بتوع الموضه والأغاني وخلاص ، كانت قلبت دماغي على حكايه شيرين وقلبت بوزها 6 سنين ، وكل ما حانشوف واحده حلوه حاتبصّلي زي المخبرين في قسم البوليس لما بيصطادوا مجرم وهاتك يا تحقيق ، بجد لو كانت عملت كده ما كنتش حاحكيلها حاجه أبداً بعد كده وأريح دماغي وخلاص .. ربنا يهديكي يا ساره وتفضلي عاقله كده

قالت ساره

منظر البحر ساحر والأحلى إني مع حبيبي ولا أخاف أن يراني أحد ، بل بالعكس أتمنى أن يعرف جميع الموجودين على الشاطئ .. إني عروسه في شهر العسل من فرط سعادتي وإحساسي بالراحه .. مر عليّ أجمل أسبوع في حياتي كله فسح وخروج وسهر وحب في حب ... مش عاوزه ابعد عن عمر ولا ثانيه فعلاً لازم يسموه شهر عسل قصدي أسبوع عسل ، بس يا خساره ده أخر يوم ونعود إلى القاهره غداً ، نظرت إلى عمر فوجدته شارد يفكر ، ياترى بتفكر في مين يا عمر ؟.. في شيرين ؟ مش معقول .. كفايه تفاهه بقى يا ساره واياكي تفتحي الموضوع ده أبداً ... أنا ما صدقت إني كسبت نقطه وخليته يثق فيّ كصديقه عاقله قبل ما أكون زوجه غيوره ، بس بجد كنت حاموت من الغيره .. بس يعني لو صرخت وبوّزت وخاصمته حاخليه ينسى أي واحده ومايبصش لواحده غيري ؟ مش ممكن طبعاً ده حايبعد عني اكتر ، لا يا سي عمر ... ده أنا حاكون قدامك ووراك وجنبك وفي كل مكان حتى تحت جلدك .. ده أنا عامله لك حته خطه الليله دي .. مش حاتخليك تفتكر لا شيرين ولا سعديه وتحلف إن مافيش في الدنيا بنت غيري .. بس استنى عليّا

قال عمر

المصاريف خرمت خالص يا واد يا عمر !!.. وباين علينا حانقعد قدام المرسي أبو العباس نكمل الأسبوع .. فطار وغدا وعشاء بره البيت ده غير الفسح !! ما شاء الله على الشحاته المتوقعه ، الحمد لله إن العربيه فيها بنزين ترجّعنا مصر بكره إن شاء الله وراجع جري على بيت السيد الوالد طبعاً علشان منحه ابويه تانيه .. حاجه تكسف بجد .. بس الحقيقه كان أسبوع يجنن كان نفسي يبقى شهر دول العزاب دول غلابه يا عم .. قال ويقول لك محلاها عيشه الحريه

قالت ساره

أنا : إيه يا سي عمر أنا حاموت من الجوع وإنت أخر طناش .. إيه خير ؟.. إنت حاتصوم السته البيض من النهارده ؟
عمــر : يا ساتر يا رب مش أنا لسه يا بنتي مفطّرك من 8 ساعات !؟.. ده انتي حاتاكلينا لما نروّح
أنا : يا باي على الغلاسه .. يابني حاموت من الجوع والناس اللي جنبنا دول ما بطّلوش أكل من ساعه ما وصلوا .. وحتى الست صعبت عليها لما لقيتنا مدينها ترمس ولب من ساعه ماجينا ، قامت عزمت عليّ بطبق محشي وإنت بتصلي العصر .. بس أنا عملت فيها العروسه الشيك وقلت لها ميرسي يا طنط .. يا خسارة المحشي
عمــر : محشي ؟!!.. يا ريتك جبتيلنا طبقين .. دي الفلوس اللي معانا يادوب تأكّلنا كشري واحتمال مافيش عشا كمان .. لازم يخ لوا العرايس يطبخوا في شهر العسل علشان العرسان ما تشحتش يا حبيبتي
أنا : طيب حانموت من الجوع ولا إيه النظام ؟.. فهّمني علشان أروح الحق طنط بتاعة المحشي بسرعه .. دول دخلوا في المسقعه
عمــر : لا يا ستي آخر وجبه حاناكلها هنا وأمري إلى الله .. حانروح ناكل في مطعم قريب من البيت ، وبعدين بالليل فيه ناس قرايبنا هنا ابنهم عمل حادثه وحاضطر أروح أشوفه شويه .. تحبي تيجي معايا ولا بتخافي من المستشفيات ؟
أنا : لا باخاف .. روح إنت .. وبعدين عاوزه أحضر الشنط وأنام بدري النهارده .. معلش يا عمر لو جيت ولقيتني نايمه ما تصحّنيش علشان خاطري
عمـر : يا سلام ؟.. لا والله ؟ كده يا ساره ... وتسيبيني أسهر لوحدي ؟
أنا : معلش يا عمر بجد تعبانه وعاوزه أنام بدري .. الظاهر حاخد دور برد .. ما تزعلش علشان خاطري
عمـر : لا يا حبيبتي خلاص .. أنا عاوزك ترتاحي .. بس افتكريها
أخيراً عمر مشي وراح المشوار بتاعه .. قدامي حوالي 3 ساعات علشان أرتّب أجمل ليله حايعيشها في عمره ، رتبت الشنط بسرعه جدا وكلمت حلواني مشهور في اسكندريه .. لأؤكد حجز تورته حجزتها من امبارح على شكل قلب احمر ومكتوب عليها اسمينا أنا وعمر وعليها كلمه : الى حبيبي .. أحبك ، ثم أخرجت صندوق المفاجآت اللي كنت محضراه من القاهره .. واللي رفضت أن يطلع عليه احد حتى أمي .. وأخرجت منه مجموعه من الشموع الحمراء والورديه ووزعتها في جميع أنحاء المنزل .. لن أوقدها الا عندما يأتي حبيبي ، ومجموعه من الورود المجفّفه جميله الشكل نثرتها على الأرضيه بشكل أسهم تشير إلى غرفه نومنا .. ثم مجموعه من البطاقات الورديه والملونه .. التي كتبت عليها عبارات غراميه إليه ووزعتها في كل المنزل بشكل مرتب ومتسلسل ، ثم دخلت الحمام وأخذت شاور سريع .. ثم ملأت البانيو بماء ساخن ورغاوي صابون منعشه لعمر عندما يأتي ونثرت فوق المياه مجموعه من القلوب الحمراء الطافيه .. وكتبت على مراية الحمام بالروج بخط صغير : كان أجمل أسبوع عسل في العالم يا حبيبي ، ثم دخلت إلى حجره النوم ورتبتها ورشيت معطر جو لم استخدمه من قبل .. ولم أنسى الشموع طبعاً .. ثم ارتديت طقم جديد ساحر كنت أخفيه .. ورشيت عطر رائع وجلست أضع الماكياج بدقه شديده .. وكأني سأتزوج مره أخرى هذه الليله .. هكذا سينسى أي امرأه أخرى سواي وليس بالنكد .. يا رب إرضى عنا ، عمر بيركن سيارته تحت المنزل الحمد لله إننا في الدور الخامس أمامي وقت لبقية الخطه ... وضعت التورته في الصاله وحولها الشموع ليراها أول ما يدخل .. ورتبت البطاقات وأغلقت أنوار الشقه كلها .. وتركت باب الشقه مفتوح قليلاً ودخلت أختبئ في غرفتي

قال عمر

إيه يا ساره ده انتي نمتي وسبتي الباب مفتوح ؟.. إيه ده النور مقطوع ولا إيه ؟.. ساره انتي فين ؟ إيه ده إيه ده أنا مش مصدق عيني .. الله الله لا يمكن أنا أكيد في حلم .. ساره انتي فين ؟ إيه التورته الرهيبه دي ؟. يااااااااااااااه ده أنا حاسس إني ملك .. سااااااااااره وإيه الكروت اللي على الأرض دي ؟ أول واحد مكتوب فيه : لو كنت بتدوّر عليّا اتبع الأسهم ، آآه ده فيه أسهم بالورود على الأرض كمان .. إيه الرقه دي ؟ والكارت اللي بعده مكتوب عليه : حد يمشي ورا الأسهم برضه ؟.. امشي ورا قلبك يا حبيبي وإنت تلاقيني ، ودخلتُ الحمام وجدته مجهز لملك أو أمير .. بجد بجد بحبك يا ساره .. انتي فين يا حبيبتي .. أكيد هنا في اوضتنا ، كمان كارت على باب الحجره مكتوب عليه : أنا باعشق أحلى رجل في الدنيا .. هو أنت .. وفتحتُ الحجره لأجد ساره تنتظرني في أجمل صوره ممكن أن أتخيلها .. أميره نائمه وسط الشموع والورود ، هل ممكن أن تُرضي زوجه رجلها وتسعده بهذا الشكل الا زوجتي الرائعه وووووو
وسكت شهريار هذه المره عن الكلام المباح

********************************

من طرف gareeb الأربعاء مايو 21, 2008 3:34 pm

أبوعلي ..
دمت مبدعاً ..
تقبل مني التحية ..

gareeb

من طرف أبوسعود الأربعاء مايو 21, 2008 4:15 pm

كيف يكون هذا الاستهتار بالإدارة الموقرة تعيد حلقة واحدة ثلاث مرات
وكأنك تشرح لمجموعة من المجانين
والعزاب يكادون ينفجرون غضباً
بانتظار باقي الحلقات غير المكررة!!

من طرف أبو علي الأربعاء مايو 21, 2008 7:20 pm

الحلقه الخامسه

قالت ساره

أنا بس عاوز أعرف اشتريتي كل الحاجات دي امتى ولحقتي ترتّبي كل ده ازاي ؟
قالها لي عمر ونحن في السياره عائدين الى القاهره .. قالها وهو يشعر بالفخر الرجولي إن زوجته أعدت له ليله من ألف ليله من اجله هو فقط ، رديت عليه بدلال وأنا أغالب النوم بشده : ده سر المهنه يا سيدي .. المهم تكون سعيد وراضي عني

قال عمر : ربنا يخليكي ليّ يا حبيبتي .. ويا رب تفضلي كده على طول .. وأنا كمان محضرلك مفاجأه .. ماما اتصلت وقالت إنها عازمانا على الغداء دلوقتي حالاً أول ما نوصل
ياااااااااااسلااام على المفاجآت الحلوه !!.. إيه الهنا ده ؟.. بدايه تفرح بصحيح !!.. ده وقته يا ربي ؟ الواحد يستعد لوصله حرق دم محترمه ، رددت هذا في سرى بالطبع ، ويبدو أن علامات خيبه الأمل كانت ظاهره على وجهي فسألني عمر : مالك يا ساره ؟ انتي مش مبسوطه ولاّ إيه من المفاجأه ؟
رددت بسرعه : لأ ازاي ده أنا حاطير من الفرحه دي طنط وحشتني جداً .. بس كنت قولي علشان البس طقم حلو أروح بيه
رد عليّ عمر : انتي كده قمر وبعدين ماما مش بتهتم بالحاجات دي خالص
وأخيراً وصلنا لبيت حماتي العامر ، وبعد الترحيب الرهيب بعمر كأنه راجع من الحجاز حالاً على جمل .. ثم بعد ساعه سلمت عليّ بفتور : أهلاً يا ساره .. أخبارك إيه ؟.. وشك نوّر على الجهاز أوي ، ثم رمقتني بنظره متفحصه من فوق لتحت وقالت بامتعاض : انتي مش جايبه هدوم حلوه في الجهاز ولا إيه يا ساره ؟

ذبت من الخجل من قذيفتها القويه وقلت في سري : مش بتاخد بالها خالص خالص !! الله يسامحك يا عمر وهممت أن أرد ولكن أنقذني عمر بسرعه ورد عليها : دي ساره عندها هدوم تجنن يا ماما .. بس احنا جايين من السفر عليكي على طول وكنت عاملها مفاجأه ليها ، لم يعجبها بالطبع دفاع عمر عنى فردت بفتور : طيب يا سيدي السفره جاهزه .. اوعى تكون نسيت أكل أمك خلاص

وجلسنا نأكل وهي منهمكه في الحديث مع عمر بشوق شديد ، وتحكي له كل ما حدث في الأسبوع اليتيم الذي قضيناه بعيداً عنها وكأنه كان عاما كامل .. وكل فتره طويله تتذكر أن فيه شيء معاهم على السفره فتلقي لي كلمه أو كلمتين ، ثم تواصل حديثها الدافيء مع حبيبها الأوحد ابنها الوحيد الحبيب ، دعوت الله في سرى أن تنتهي هذه العزومه سريعاً كي أصل شقتي وأفرغ حقائبي وأناااااااااااااااااام .. لأني تقريبا لم أنم أمس مع السفر وإرهاقه .. وبينما أنا في أفكاري رن موبايلي ووجدتها أمي وطرت إلى البلكونه لأرد عليها

ماما : الو يا ست العرايس نموسيتك كحلي .. أنا مش عاوزه أكلمك من الصبح علشان ما أقلقكوش يا حبيبتي .. يا ترى حاترجعوا امتى ؟
رددت ببراءه : لا ما احنا وصلنا من ساعتين يا ماما ما تقلقيش
ماما : طيب يا حبيبتي أسيبك ترتبي شنطك وترتاحي شويه وأكلمك بعدين
أنا : لا يا ماما أنا مش في شقتي .. أنا عند حماتي
ماما : حماتك ؟.. يا سلام .. جايه جري من اسكندريه عليها !!..ولا حتى هان عليكي تعدّي على أمك ولو خمس دقايق ؟! متشكره يا ساره .. ربنا يخليهالك ماهو خلاص الجواز بينسّي الأهل .. ألف شكر يا بنتي مع السلامه

أنا : استني بس يا ماما .. يا ماما .. يا ماما يا ربي أعمل إيه في الحدوته دي ؟.. هو عمر السبب في المشكله دي ، كان لازم يقول لي من امبارح أقوم أمهد لماما علشان ما تزعلش منى كده
فاجأني عمر من خلفي وهو يهمس لي : إيه شهرزاد قاعده لوحدها ليه ؟.. وحشتيني
رددت بعنف : بلا شهرزاد بلا نيله !.. إنت عملتلي مشكله كبيره مع ماما يا سيدي
عمر : مشكله ؟.. ليه يا بنتي هو أنا شفتها أصلاً ؟
أنا : زعلتْ يا سيدي لما قلت لها إننا هنا ، وافتكرتني نسيتها وبافضّل آجي بيتكم هنا قبل ما أروح اسلم عليها .. كان مفروض تقولّي من امبارح يا عمر أقوم اعرف أتصرف
عمر : يا ساره ما أنا قلت لك انى أنا نفسي اتفاجأت وماما كلمتني الصبح قبل ما نسافر مباشره .. وبعدين يا ستي ولا تزعلي نروح لها دلوقتي ونصالحها حالاً .. هو أنا عندي كام ام ساره ؟
رميت نفسي في حضنه وأنا اهتف : ربنا يخليك ليا يا حبيبي
وطبعاً دخلت حماتي علينا وهتفت باستنكار : خلاص مش قادرين على فراق بعض ؟.. طيب الظاهر إن أنا اللي عزول واطلع منها
فضممت أمه إلى صدري هي الأخرى وأنا أقول لها : ده انتي الخير والبركه يا حبيبتي .. وأنا اهمس في سري : يا ربي على صغر عقل الستات والغيره اللي تنقط .. لأ والهنا إن أمي كمان بتغير
طيب يا طنط معلش احنا مضطرين نمشى علشان لسه حانعدي على ماما نسلم عليها .. قلتها ببساطه وندمت عليها من رد فعلا حماتي الغاضب : تمشوا ؟.. هو أنا لحقت أقعد معاكم ؟.. هو انتو جايين تقضيه واجب وخلاص ؟.. الظاهر إن أنا فارضه نفسي عليكم .. طيب يالا ماتعطلوش نفسكم
نظر لي عمر بغضب وكأنه يقول لي فتحتي بقك انتي ليه ؟.. وأخذ يهدأ من أمه ويبرر لها انه لابد أن ينام بدري لأن بكره وراه أشياء كثيره الخ الخ الخ
وأخيييييييييراً جداً انتهت الزياره واستعدينا للمعركه الثانيه في بيت ماما

في السياره قال لي عمر بهدوء : بصي يا ساره ماتزعليش من ماما وأنا كمان مش حازعل من والدتك لو عملت حاجه .. كل واحده فيهم فجأه فلذة كبدها اتخطف منها من إنسان غريب ، فلازم فتره يعاملوا فيها الغريب ده بحذر ويمكن غلاسه لحد ما يبدأوا يحبوه فعلاً ويتأقلموا على الوضع الجديد .. ولازم نكون احنا الشباب أعقل وصدرنا أوسع .. بس أوعي تعرضي نفسك لماما يعنى أي حاجه خليني أنا أقولها وكأنها فكرتي أنا علشان تتقبلها .. ونفس الشيء مع والدتك علشان نقلل الخساير بقدر المستطاع .. ماشي يا قمر ؟

رديت عليه وقلت : خلاص يا حبيبي اتفقنا .. وفي سري قلت ده الجواز ده عاوز نفس طويييييييييييييييييل ودماغ كبيره جداً .. ربنا يستر

قال عمر

أنا ذنبي إيه في الحرب دي يا ربي ؟ كان مالي أنا ومال الجواز وشغل الحموات ده ، يا ربي ساعتين من لوي البوز من حماتي المصونه ، وتبريرات طويله عريضه من ساره ومنّي حتى ملّيت في الأخر .. أمّال لو كنا قتلنا قتيل كانت ماما وحماتي عملوا فينا إيه ؟ بجد كنت مفروس من حماتي وساره عماله تراضيها وتصالحها ، وكنت حاعمل مشكله بس قلت يا واد مش من أولها كده أعقل ربنا يهديك .. يا رب الواحد يفضل محتفظ بأعصابه على طول وما يعملش مصايب ، فكرت في كل هذا وأنا أقود السياره إلى منزلنا أنا وساره ، وأنا أقاوم النوم باستماته بعد الحرب العالميه التاسعه اللي كنا فيها .. والتفتّ إلى ساره وجدتها قد نامت بالفعل من شده الإرهاق الجسدي والعصبي ، وصلنا البيت ولم أشأ أن أوقظ ساره الا لما أفرغ الحقائب من السياره أولاً .. وأوصلتها إلى الاسانسير ثم أيقظت ساره بهدوء وكعادتها اتنفضت وصرخت : إنت مين ؟ وإنت خاطفني ولا إيه ؟ يااااعوماااااااااار .. وقبل أن تكمل استغاثتها الدوليه برجال المطافي وتفرج علينا الشارع ويفتكروني خاطفها ، حطيت إيدي على فمها وانتظرت أن تتعرف عليّ والحمد لله أخيراً فاقت وعرفتني وسألتني سؤال أغرب من الخيال : إيه ده عمر ؟ إيه اللي جابنا في الحته المقطوعه دي ؟ أنا حاموت من التعب .. لو رسمولي مخده على الحيطه حانام فوراً !!! عاوزه أنام حالاً علشان بكره الجمعه وبعده السبت حانرجع على شغلنا أنا وإنت ، يعني بكره يوم كله شغل وتجهيز أكل للأسبوع كله وتوضيب الشقه وأكيد حانتعب بكره أوي

قلت : حانتعب ؟ إيه الكلمه الغريبه دي ؟ وأنا مالي أنا ؟
ردت سـاره : مالك ازاي ؟ مش احنا اتفقنا نتشارك في كل حاجه ؟
أنا : يا سلام ؟ اتفقنا أخرّط لك البصل وأمسح الأرض ؟ إيه يا بنتي الأوهام دي ؟
ساره : أوهام يا سلام هو لما تساعدني تبقى عايش في الوهم ؟ أمال أنا حبيبتك ازاي ؟
أنا : يا ستي حبيبتي وروحي كمان ، لكن اللي انتي بتقوليه ده أنا ما أقدرش عليه أبداً ولا يمكن حايحصل وده أخر كلام عندي في الموضوع ده
سـاره : كده يا عمر ؟
أنا : أيوه كده وياريت ننام بقى قبل ما نتخانق
سـاره : هو احنا لسه ما اتخانقناش ؟.. طيب تصبح على خير
أنا : ...... !!؟

من طرف gareeb السبت مايو 24, 2008 4:02 pm

كل حلقة أجمل من الأخرى ..
أتابع بقوة ..
لأنها جميلة ..
شكراً (( ون ثاوزن )) أبوعلي ..

من طرف أبو علي الثلاثاء مايو 27, 2008 2:17 pm

الحلقه السادسه

قالت ساره

ياااااااااسلام على رواقه الرجاله .. بعد الغداء أخبرني عمر انه نازل يقابل أصحابه وبعدين حايعدي على والدته وحيتأخر ولما أخبرته إني حاعمل أكل الأسبوع نظر لي باستغراب وقال لي : طيب مع السلاااااااامه ، بجد أنا زعلانه منه .. طيب يا عمر لما ترجع

قال عمر

لازم ساره تتعوّد إن كلامي يتنفّذ ولما أقول مش حاساعد يبقي خلاص .. لازم تتعود على كده ويبقي هو ده نظام الحياه بيننا .. حاتزعل شويه في الأول وبعدين خلاص حاتتعود .. مع إن مش هاين عليّ زعلها ، طيب أكلمها على الموبايل بعد شويه .. لا .. إجمد بقي يا عمر لو إتعودت انك تساعدها في كل حاجه حايبقى حق مكتسب ولو ما عملتوش حانروح النيابه !!!.. لا وعلى إيه تزعل شويه وخلاص

قالت ساره

طيب أنا مفروض أعمل إيه دلوقتي بالظبط ؟ أنا الأول أرتّب الشقه لأن التراب من قفلتها أسبوع يترسم عليه خرايط .. ولسه حافضّي الشنط وأغسل الهدوم اللي كانت معانا في اسكندريه وبعدين أطبخ كذا صنف أشيلهم في الفريزر علشان يكفّوا الأسبوع كله ، يا رب يخليكي لينا يا ماما كنتي شايله الهم ده كله عني وأنا كنت أتنح قدام التليفزيون ولاّ أرغي في التليفون وخلاص .. والاهم إن معلوماتي عن الطبيخ محتاجه مترجم يفك رموزها الهيروغليفيه ، ربنا يستر ، طيب أنا أحط اللحمه تتسلق الأول علشان بتاخد وقت وبعدين أشغّل الغساله .. بس لازم البس جوانتي علشان ريحه البصل علشان عمر لما ييجي ، ولا ليه .. خلّيه يشم البصل .. مش هو اللي سابني في الحرب دي .. يستحمل بقى ، هي اللحمه شكلها غريب كده ليه ؟.. طيب مش مهم .. أعمل إيه تاني ؟ مسقعه ؟ يا سلام ده أنا باموت فيها بس عمري ما شفت ماما بتعملها ازاي ؟ هي فيها باذنجان وحاجات تانيه غريبه .............. يا مااااااااما الحقيني ، وجريت كلمتها على التليفون وقعدت تهزّأ فيّا الأول إنها ياما قالتلي أتعلم ومافيش فايده الخ الخ الخ ، المهم إنها قالت لي الطريقه مع استخدام ألفاظ غريبه .. تعملي اللحمه عالصاج الأول !!!.. أجيب منين صاج دلوقتي يا ماما ؟ وطبعاً يصحب هذا وابل من التريقه والدعاء لعمر بالصبر على ما ابتلاه ، وطالت المكالمه ساعتين وماما تشرح لي كأن كلامها كله طبيعي ومفهوم وأنا من كتر التريقه اللي خدتها لم أسأل على أشياء كثيره وقلت أعتمد على خيالي الخاص ، وتوكلت على الله وبدأت المعركه الحقيقيه أضرب الطماطم لا أسلق المكرونه الأول ، طيب أقطع البطاطس شرايح ولا قطع ؟.. أنا باقول مثلثات وخلاص ، إيه حدوته الملوخيه دي لازم أقعد أخرطها ساعتين ؟.. لا حاهريها في الكبه وخلاص بس مش عارفه اتكورت كوره صلبه في قاع الحله كده ليه ؟ صينيه البطاطس وضعتها في الفرن مباشرةً بس حاسه إني نسيت حاجه فيها .. هيّ ليه لسه صلبه رغم إن بقالها ساعه ونصف في الفرن والقاع اتحرق ومع ذلك لسه ناشفه ، يا ربي إيه الوقعه دي .. كان مالي ؟.. أنا مانا كنت أميرة زماني وأخر رواقه .. خلاص اللي اتعمل اتعمل طيب لو عمر اتكلم ؟؟؟؟؟؟؟ ييييييييييييييييه .. أنا نسيت الغسيل .. طلعت البلكونه أنشره وقعدت أفتكر إيه بيتنشر الأول وإيه اللي ورا ؟ طيب إيه من رجله وإيه من قفاه ؟ إيه الفيلم ده ..؟؟ دول الستات دول ناس رايقه ما كله حاينشف وخلاص .. ولاحظت وجود سيده أروبه في البلكونه تراقبني كي تري العروس الميمونه اللي هي انا حاتنشر ازاي ؟ ولا همّني من نظراتها وعملت كرنفال من الهدوم ابيض على احمر على اخضر واديله .. المهم ينشفوا وخلاص ، ورجعت للكارثه الموجوده في المطبخ وتذوقت ما طبخته وصرخت : ياللهول .. على رأي يوسف وهبي ، طيب والحل ؟ فتحت الفريزر لأجد ماما حبيبتي وكأنها عارفه المصيبه اللي حاعملها حاطّه كميه كبيره من أكياس الهامبورجر والدجاج النصف مقلي والطبخات السريعه .. الحمد لله كنت حاطلّق وانا لسه في شهر العسل ، يااااخبر ده عمر بيرن على الموبايل إذن هو في الطريق وطبعاً ملابسي لا توصف من القنابل اللي كنت باعملها في المطبخ .. كرنفال من البصل والثوم والزيت .. لمّيت الكوارث اللي عملتها ووضعتها في الثلاجه وجريت على الحمام وأزلت أثار العدوان وغيرت ملابسي ، أمال هم بييجوا في التليفزيون بيطبخوا وكأنهم رايحين سهره ليه ؟
ودخل عمر وبسرعه أظهرتُ البوز المتين على غلاسته معايا قبل ما ينزل وانتظرت ان يأتي يصالحني كالمعتاد ولا فائده .. ثم لاحظت انه متعب ويتنفس بصعوبه فجريت عليه انا وقلت له : مالك يا حبيبي .. إنت تعبان ؟
وأخذت أمسح له عرقه وأسقيه الماء وأنا أكاد أبكي وأقول له : انشا الله أنا وإنت لا يا حبيبي .. وأنا ممسكه يده الضعيفه
وفجأه .. اشتدت قبضته عليّ وجذبني له وضحك بقوه وقال : طالما انتي بتموتي فيا كده ، ما تكشّريش أبداً في وشي .. اتفقنا ؟

استيقظت منتفضه على رنين المنبه المزعج واعلانه الساعه السادسه والنصف صباحاً وشعرت بألم في كل جسدي فأنا لم أنم سوي ساعتين بعد صلاه الفجر التي صليناها أنا وعمر ، واليوم هو أول يوم نعود فيه للعمل .. وطبعاً عمر ولا على باله فعمله قريب من منزلنا الجديد تقريبا ربع ساعه بالسياره أما أنا فيبعد حوالي ساعه وربع في أفضل الظروف ولم أكن أشعر بهذا قبلا بل كان قريب من منزل أبي وأمي أما الآن فلازم ألف الكره الارضيه علشان أوصل عملي ، والأسوأ أن عمر لن يستطيع توصيلي لأن جهة عملي وجهة عمله مختلفتان تماماً فلو اوصلني أولاً سيصل هو عمله بعد أذان الظهر وسيرفدوه بإذن الله ونشحت على باب السيده بعد أسبوع على الأكثر ، إذن لا مفر من حرب المواصلات الرهيبه أن أخوضها وحدي ولا أستطيع حتى الشكوى لأن عمر من البدايه غير موافق على عملي ولكني أصريت فلا أستطيع حتى التنفس بكلمه واحده ، الحمد لله أنا لا أفطر يعني حالبس بسررررعه جداً وأجري لألحق بالميكروباص الشيك جداً لعلي أصل في موعدي في أول يوم .. مش ضروري كرامتي تتبعتر من المدير وأنا عروسه كده ، ارتديت ملابسي على عجل وأخّرت إيقاظ عمر إلى أخر لحظه كي ينام قليلاً .. وبعد إتمام ملابسي وارتدائي الطرحه والشنطه كمان اقتربت منه وقبلته في جبينه وهمست له : صباح الخير يا حبيبي .. اصحى بقي كفايه كسل

رد عمر متثائباً : صباح الفل يا حبيبتي .. إيه ده إنتي لبستي بسرعه كده ؟ كان نفسي أوصلك بس بعون الله لما نلف القاهره كل يوم حنترفد أنا وإنتي جماعه

انا : ولا يهمك يا حبيبي أنا قدها وقدود .. على فكره حتوحشني لحد ما أرجع .. يالا مع السلامه أحسن كده اتأخرت

عمـر : وانتي أكتر يا حبيبتي بس إمتى لحقتي تحضري الفطار ؟ انتي صحيتي إمتى على كده ؟

أنا : فطار ؟!!! إيه الكلمه الغريبه دي ؟ ما إنت عارف إني مش بافطر يا حبيبي ؟!! وبعدين مافيش وقت خالص

فرد بعناد : بس أنا بقي بافطر وخصوصاً قبل ما أروح الشغل لازم أفطر فطار متين علشان مش باكل بره وبأفضل عليه لحد ما أرجع .. والدتي كانت معوّداني على كده

رديت في سري وأنا أنظر للساعه : الله يسامحك يا حماتي أي حاجه حلوه تبقي من ناحيتك علىّ طول ! طيب والفطار المتين ده يبقي إيه يا سيدي ؟

عمر : عادي زي كل الناس بيض مسلوق أو عجه وطبق فول بالزبده ولانشون وجبنه وزيتون وزبادي وطبق خضار كبير خيار وطماطم وخس متقطعين شرايح رفيعه خالص وطبعاً كوبايه حليب وبعدها شاي وخلاص

أنا : يا خبر أبيض ده لو كل الناس بتفطر كده ممكن تحصل مجاعه في البلد .. وبعدين اللي إنت بتقوله ده عاوزله ساعه على الأقل وأنا متأخره يا عمر

رد بعناد أكبر : ما أنا قلت الشغل مش حاييجي منه غير وجع القلب .. يعني انتي عاوزاني أنزل من غير فطار يا ساره

أنا : لا ازاي ؟.. أترفد أنا في داهيه ... علشان تفطر الفطار المتين يا سيدي .. قلتها في سري طبعاً وأنا أكاد أبكي وأنا متجهه إلى المطبخ لأعداد وليمه الفطار لسي السيد

توجهت إلى المطبخ وأنا أجري مثل البهلوان أضع البيض على النار وأقطع الخيار وأخرج الجبنه من الثلاجه وأسخن الفول وووووووووو ... مش ممكن كل ده حياكله .. أبداً
ده أنا طول عمري بأتريق على المسلسلات التي تجعل جميع الأسره صباحاً يجتمعون على مائدة الإفطار وعليها عشره أصناف على الأقل وكان بيستفزني جداً طبق البيض المسلوق الموضوع به 40 بيضه والشاي لابد ان يكون مقدم في طقم كامل البراد والسكريه وخلافه .. يعني لازم الزوجه علشان تعمل الهيصه دي كلها تبتدي تحضر الفطار من اذان الفجر تقريبا او ما تنامش أسهل وخلاص علشان الباشا يفطر الفطار المتين ، أخيييييرا .. انتهيت ووضعت الأطباق على السفره وكان الباشا بيقرأ الجريده بمنتهي الرواقه وصببت الشاي فصرخ وأنا أصبه : لا يا ساره أنا قلت لك الحليب الأول وبعدين الشاي

فنظرت إلى ساعة يدي وجدتها الثامنه الا ثلث فكدت أبكي فلم أرد أن ابدأ اليوم بخناقه فرديت عليه من تحت أسناني : معلش يا عمر فيه شاي تاني كتير .. أنا نازله بقي أصلي اتأخرت جداً جداً

رد وقال : طيب يا حبيبتي افطري الأول

قلت : حبيبتك ؟!!! طيب باااااااااااي

ونزلت من العماره وأنا أجري تقريبا وأكيد البواب قال يا عيني دي العروسه الجديده الظاهر واخده علقه على الصبح وهربت من العريس ، مشيت مسافه طويله حتى موقف الميكروباص لأن الميزانيه لا تسمح بتاكسي بالطبع !! وانتظرت طويلا حتى وجدت مكان فاضي وركبت وسرحت في الطريق وأنا أفكر إن هذه هي البدايه الجاده للزواج لابد فيها من تعب وإرهاق ومسئوليه كبيره ، الله يكون في عونك يا ماما طول عمرها بتشتغل وعمرها ما أشعرتنا بأي تقصير ، أنا كان مالي ومال الحدوته دي ما كنت مريّحه دماغي ولا فطار متين لا مواصلات ولا بهدله ، بس إيه البديل ؟ الوحده ؟ الصمت ؟ الفراغ والاكتئاب ؟ العنوسه بكلمه أشمل ؟ لا طبعاً مهما بذلنا من جهد في دائرة الزواج أفضل بكثير جداً من الراحه خارجه ، ربنا يخليك لي يا عمر وتفطر كل يوم .. بس ربنا يستر من المدير وغلاسته

قال عمر

أهلاااااااااااا يا سي عمر ... إيه يا عم جاي في ميعادك تمام .. ألف مبروك يا عريس ايوه كده وشك نوّر على الجواز !!! يالا يا سي عمر احكي لنا كل حاجه بالتفصيل !! ولا أقول لك بلاش إنت إيه رأيك الجواز حلو ولا زي ما بنسمع من الرجاله ؟
كان هذا استقبال زميلي في العمل لي .. فرددت عليه قائلاً : يا سيدي الله يبارك فيك والله الجواز ده أكبر نعمه للرجل واللي يقول غير كده يبقي جاحد للنعمه بصراحه

قال زميلي : يا عم يا عم طيب يا سيدي ربنا يسعدك لما نشوف رأيك إيه بعد سنتين

قالت ساره

ألف مبروك يا عروسه ناموسيتك كحلي .. متأخره ساعه بحالها .. طبعاً يا ستي مين قدك ده انتي حتى شكلك ما نمتيش كويس .. طبعاً يا ست العرايس ربنا يسعدك .. يالاّ بقي احكي لنا كل حاجه بالتفصيل الممل .. ألا صحيح يا ساره العريس لازم يحضّر الفطار لعروسته بنفسه ؟

كان هذا استقبال زميلتي لي .. فرددت عليها قائله : ايوه طبعاً لازم يحضر لها فطار متين كل يوم
وطبعا استدعاني المدير وأخذت كم لا بأس به من الكلام البارد على تأخيري وتلميح على إن لو كان الجواز حايغيّرني يبقي أقعد في بيتنا أسهل أقشّر بصل

قال عمر

يا حبيبتي يا ساره وحشتيني الكام ساعه دول .. لمّا أبعت لها رساله علشان تعرف إني بافكر فيها ، يا تري يا قمر بتفكر فيا زي ما بافكر فيك ؟؟ فردتْ على الفور ، أنا كمان بافكر فيك يا حبيبي وقلقانه عليك من طن الأكل المتين اللي أكلته الصبح .. ربنا يستر وماتاكلنيش وأنا نايمه .

قالت ساره

أخيرا انتهى اليوم الساعه الثالثه وعمر ينتهي من عمله في الخامسه .. ياااااااارب ألحق أوصل بسرعه وأحضر الغداء ، ورجعت في نفس رحله العذاب الصباحيه في المواصلات ولكن مع الحر والرطوبه ما شاء الله ما أقدرش أوصف شعوري وصلت بيتي الساعه 4 وتلت تقريبا يعني ساعه وعمر جاي وأنا أكاد أقع من التعب وقله النوم .. طيب يا ربي حالحق أخد حمام من الحر الفظيع ده ؟ ولاّ أجهز الغداء ولا أرتب البيت ؟ فسيادته لم يرفع حتى أطباق معركه الفطار الصباحيه ، لم أعرف ماذا أفعل فوقفت في منتصف الصاله وصرخت : تعاااااالي لي يااااااااااامامااااااااااااا

من طرف gareeb الأحد يونيو 01, 2008 1:14 am

شكراً ..
جزاك الله خير حمودا ..
مازال الإنتظار جاري ..
للحلقة السابعة ..

من طرف أبو علي الإثنين يونيو 02, 2008 1:20 pm

الحلقة السابعة

قالت سارة
:
أخذت أجري في الشقة كالهاربة من حكم قضائي وانا أحاول جاهدة ان أنهي تنظيف الشقة وتجهيز الغداء وتغيير ملا بسي ومفروض كمان اتزين وأقابله بابتسامة كبيرة
طيب بجد ازاي وامتى؟
ازاي تجتمع رواقة شهرزاد مع واحدة بتشتغل 8 ساعات ويتحرق دمها بمعدل كل ربع ساعة وبترجع بيتها محشورة في المواصلات زي قفص الطماطم؟ طيب هو كمان ذنبه ايه يرجع يلاقيني مكشرة وتعبانة ومتوترة ؟ ماهي أكيد ح تقلب بخناقة.. طيب اعمل ايه ياربي ؟
خلاص يبقي الاهم فالمهم.. انا أهم حاجة أعملها دلوقتي اني أغيّر هدومي العجيبة دي والبس طقم جميل بسرعة وأضع ماكياج خفيف واي حاجة تانية تتأجّل
كانت دايما والدتي تقولي ان الرجل لا يحب ان يضيع الاوقات الجميلة !!! يعني لو دخل البيت ولاقاكي عاملة وليمة طعام رهيبة موت.. بس شعرك مضروب في الخلاّط وريحتك بصل وهدومك مبقّعة ومش طايقة حد يكلمك غالبا حيتصل بالبوليس او يطفش من سكات !!! لكن لو جه ولاقاكي زي القمر ومشتاقة ليه والاكل يا حبيبي النهاردة فول وبيض حيبقي على قلبه زي العسل
خلاص ح أجرب واشوف
وبالفعل هدّيت نفسي تماما ووضعت الاكل في الفرن كي يسخن وعملت الارز سريعا وشربت كوب شاي بمنتهي الرواقة ولااااااا كأن في حااااجة خااااالص ثم دخلت الحمام وأخذت شاور سريع وارتديت طقم رائع ووضعت ماكياج وتعطرت وبدأت في ترتيب المنزل
و بعد 5 دقائق جاء عمر وكنت لا ازال أزيل اثار الفطار المتين !!! ولم افعل شيء اخر
*********
دخل عمر فجريت عليه واحتضنته وقلت له: وحشتني يا حبيبي
فرد عليّ وقد سرّ من استقبالى الدافيء: وانتي كمان يا حبيبتي.. ايه الجمال ده معقول انتي راجعة من الشغل من شوية؟.. اوعى تكون زوغت يا جميل
أنا: لا ما زوغتش بس انا زعلانة منك ما تكلمنيش لو سمحت
عمر: ليه بس عملت ايه ؟
رديت عليه بدلال: كده تبعت لي رسالة واحدة وما تكلمنيش غير مرتين بس؟؟ لا يا سيدي انا ما ينفعنيش القسوة دي
فرد بسعادة من كلامي ولهفتي عليه: والله لو عليّ ما كنت نزلت من البيت وسيبتك.. ده انتي وحشتيني جدا.. ايه ده.. هو لسه الفطار مكانه.. معقول ؟
برطمت في سري: و هوّ يعني انا اللي فطرت وسبته؟!!.. يعني الفليبينية اللي هيّ انا ح تقطع نفسها ؟ وكدت أرد بعصبية ولكني وجدت انها ح تقلب بغم فرددت بدلال: ما حبيبي هو اللي فطر وسابه والله انا كنت لسه ح أشيله ليك بس علشان ما اتعبكش خاااااااااالص
عمر: هو صحيح انا متعود اني ما أعملش حاجة في البيت خالص قبل الجواز بس علشان خاطرك ح أشيله المرة دي بس ما تتعوديش على كده
رديت عليه بدلال اكبر: وفيها ايه لما أتعود ؟ هو حرام لما حبيبي يدلعني ويريحني ؟ ده انت كده تثبت لي انك بتحبني بجد ومش عاوز حبيبتك تتعب
رد بنفاذ صبر: يا ستي هو الحب عندك اني أكنس وأغسل الحلل ؟
أنا: وانت الحب عندك انك ترتاح وترمي كل الحمل على أكتافي انا؟.. يعني ازاي أكون باحب انسان وألاقيه تعبان جدا وماأحاولش اني أساعده بأبسط مساعدة؟
عمر: يا حبيبتي انا بارجع تعبان وعاوز ارتاح ومش معقول أشتغل جوة البيت كمان
أنا: يا حبيبي يعني انت بتشتغل أكثر من الرسول عليه الصلاة والسلام اللي كان قائد أمة بحالها ؟
عمر: عليه الصلاة والسلام لا طبعا وانا اجي جنبه ايه ؟
أنا: طيب يا سيدي الرسول عليه الصلاة والسلام كان بيعمل عمل أهل البيت طول ماهو موجود معاهم يعني بيساعدهم.. شوفت بقي يا سي السيد ؟
وأحب ان ينهي الحوار عندما وجد نفسه سينهزم وقال بنفاذ صبر: طيب طيب يا سارة سيبيني أغيّر هدومي علشان آكل وأنام شوية
وأحسست ان الموضوع ح يقلب بحرب وانا لسه في بداية حدوتة جوزك على ما تعوديه!!.. فابتسمت وقلت له برقة: طيب يا حبيبي قدامك 3 دقايق تغير فيهم هدومك علشان أكتر من كده حتوحشني ويمكن أبلغ البوليس ولا حاجة
فابتسم لي بغرور ولم يرد
يا عيني على عقل الرجالة
*********
حضّرت الأكل سريعا وانا أدعي في سري ان يعجبه وان كنت أشك في ده.. بس ربنا يستر
والحمد لله الهامبورجر موجود برضه علشان الجيران ما يسمعوش صوتنا ويقولوا العروسة الجديدة بتنضرب علقة سخنة
وجلسنا سويا حول الاكل وحاولت حماية نفسي سريعا من العلقة المتوقعة فقلت له: دي أول أكلة يا حبيبي أعملها لك بايدي وانا عارفة اني لسه باتعلم الطبيخ بس كفاية اني عملتها لأحلى راجل في الدنيا علشان تبقي تجنن مش كده ؟
رد عليّ وقال: ربنا يخليكي لي يا حبيبتي انا مش قد الدلع ده كله.. ثم تذوق صينية البطاطس وكله أمل في الحياة وفي ثواني ظهرت على وجهه ملامح واحد يبحث عن رقم بوليس النجدة
ورديت بمنتهى الاستهبال: ايه يا حبيبي رأيك ايه؟
فرد باحراج من مقدمة الدلع الجامدة: تسلم ايدك يا حبيبتي !!! بس هي مختلفة شوية عن اللي انا متعوّد عليها
فرديت ببراءة الاطفال: ميرسي يا حبيبي بالهنا والشفا
*********
قال عمر
:
ياسلام يا واد يا عمر.. اول مرة أشوف البطاطس ليها طعم السبانخ المخلوطة بالذرة !!.. والرز شبه كورة القدم خماسية الاضلاع
أكلتين كمان من دول وييجي لي كساح
بس معقول أزعلها وهي عمالة تدلّع فيّ كده؟؟؟؟
ياااااالا ما احنا ياما أكلنا أكل حلو.. إدّيها هامبورجر واعمل نفسك من طنطا
*********
قالت سارة
:
الحمد لله عدّت على خير.. طيب لما أشوف ح يشيل معايا الاطباق ولا ح يستندل كالمعتاد فقلت: عمر ممكن تشيل معايا الاطباق لو سمحت؟
عمر: يوووه يا سارة كفاية طلبات أرجوكي
فرديت بمسكنة: طيب اسفة.. اني ضايقتك !! ومشيت بانكسار مفتعل وانا أحمل الاطباق فماهي الا لحظة واحدة وقام طبعا وقال لي: خليكي انتي يا حبيبتي انا حاشيلهم.. وانتي ارتاحي
ضحكت في سري من طيبته وأكملت خطتي بعد ما فرغ من الاطباق وقلت بدلال كبير: طيب يا حبييي ادخل انت نام شوية وانا ح أغسل الاطباق هو انا كنت عاوزة اتكلم معاك شوية قبل ما تنام بس مش مهم انا ح أغسل الاطباق لوووووووحدي وانت ادخل ارتاح.. بس تعرف انت واحشني وكنت عاوزة اتكلم معاك واحكي لك على اللي حصل كله النهاردة.. بس يوم تاني بقي
عمر: لا يا سارة يا حبيبتي سيبي الاطباق مش مهم وتعالى نقعد مع بعض شوية
أنا: أسيبها ؟ لا يمكن ابدا ابدا ابدا
عمر: طيب يا حبيبتي انا ح أساعدك وأغسلهم معاكي.. ما تهونيش على
أنا: انت أحلى زوج في الدنيا دي كلها.. وبجد وحشتني
*********
قال عمر
:
أخيرا جه يوم الجمعة.. يوم الاجازة
مفيش صحيان بدري ولا جري على الشغل
ياحبيبتي يا سارة نايمة زي الملاك.. تعبتْ جدا الاسبو ع ده.. بس اكيد ح تتعوّد وحيبقي الموضوع أسهل عليها وانا كمان بقيت أساعدها شوية بس علشان بحبها
فرصة والدنيا لسه هادية أقوم اقعد لوحدي شوية واقرأ الجرايد على رواقة واشرب كوباية شاي موزونة ومش ضروري فطار النهاردة
الله الشقة شكلها جميل اوي
الصبح.. الشمس داخلة من الشبابيك والستائر الحرير معطيه نعومة ورقة للبيت.. كل البيت ده بتاعي انا ؟! ده انا طول عمري لي اوضة واحدة في بيت والدي وكنت باعتبرها مملكتي الخاصة وناقص اكتب عليها ممنوع الاقتراب او التصوير!!.. فجأة الاقي لي شقة كاملة جميلة زي دي وانا راجل البيت ؟؟! احساس رائع باكتمال الرجولة يارب يديمه علينا
وجلستُ أقرا الجرائد في روقان وهدوء حتى مر الوقت وباقي ساعة على صلاة الجمعة.. فرصة أقرأ سورة الكهف قبل ان انشغل في اي حاجة تانية
*********
قالت سارة
:
اول مرة اصحى براحتي من اسبوووووع كامل مش مفزوعة من صوت المنبة الجبار.. صحيح الستات مفروض يقعدوا في البيت بس علشان يناموا براحتهم
ايه ده عمر فين ؟ الراجل طفش ولا ايه ؟ باضحك جدا لما اشوف في التليفزيون واحدة صاحية من النوم وقبل ما تفتح عينيها تتحسس مكان نوم جوزها كأنها بتدوّر على فردة شراب مثلا ! طيب ما تفتح عينيها أسهل وح تكتشف ان المذكور فلسع من بدري
تلاقيه طلع نام في الصالة ولاّ بيتكلم في التليفون.. لا مفيش وقت دي صلاة الجمعة قربت.. واقتربت لأشاهد منظر جميل طالما حلمت به قبل زواجي.. وجدت عمر يجلس تحت شباك الصالة وممسكا بالمصحف ويقرأ في خشوع بصوت رخيم وتجويد سليم حتى انه لم يشعر بوجودي
اقتربت لأجلس بجواره استمع اليه.. ولكني وجدت نفسي لا شعوريا أجلس تحت أقدامه.. فليس الرجل الغني او الوسيم هو من تعشقه المرأة.. ولكنه الرجل الذي يخشى الله
جلست على الأرض أستمع لسورة الكهف وكأني أسمعها لأول مرة.. سعدتُ من صوته الرخيم وخشوعه وأحاط بنا هدوء واطمئنان وكأن الملائكة يباركون اجتماعنا.. وانا اختلس النظر لوجهه وهو يقرأ لأستمتع بملامحه الخاشعة وأشكر الله على نعمته التي انعمها عليّ.. حتى انتهى من القراءة وجذبني من يدي لأجلس بجواره وسألني: ليه يا حبيبتي قعدتي على الأرض؟.. ده انتي تقعدي جوّه عيني
أنا: لا يا حبيبي حسيت انك كبير اوي وانت في حالة الخشوع دي ما قدرتش أقعد جنبك
عمر: ياااه انتي مكبرة الموضوع ربنا بس يتقبل.. وانتي متعودة على قراءة سورة الكهف كل جمعة؟
أنا: بصراحة ساعات ساعات مش دايما
عمر: لا يا حبيبتي ان شاء الله نقراها دايما سوا.. وبعدين خليكي شطورة واسمعي كلام عمو عمر علشان اديكي الهدية اللي جبتهالك امبارح
نطّيت بسرعة: ايه ده هدية ؟ كده وساكت من امبارح يا غلس؟
عمر: أصلهم مش هدية واحدة دول اتنين
أنا: كمان ؟ كفاية غلاسة بقى.. يالا مش قادرة استنى
رد بمكر ذو مغزى : طيب تدفعي كام ؟
فهمت مقصده وقلت له: مش عاوزة منك حاجة
ضحك وقال: طيب خلاص خلاص انا باضحك معاكي شوفي يا ستي دول أهم هديتين حتاخديهم في حياتك.. اول واحدة اتفضلي ياستّي.. تاتاتاتاتاتاتاتاتا
وفتحت لفة الهدية البرّاقة ثم صرخت بخيبة امل: يااااااااااااااسلام.. حصالة !!!!!!!!!!! لا والله وجاي على نفسك كده ليه؟ ودي أحط فيها مصروف البيت ولا أحوش لبنتك اللي في خامسة ابتدائي؟
عمر: ياساتر يارب.. استني شوية.. ايه ده مدفع رشاش؟ استني لما افهمك حتعملي بيها ايه ؟
انا: اتفضل يا عم الموفِّر
تجاوز عن التريقة ورد بصبر: دي يا ستي انا وانتي ح نحوش فيها كل يوم اي مبلغ ان شا الله جنيه واحد.. اي فلوس والسلام ونيجي اخر الاسبوع يوم الجمعة نفتح الحصالة ونتصدق بالمبلغ ده.. وبكده نكون كل يوم بنطلع صدقة حتى لو كانت بسيطة.. وممنوع انه يعدي يوم من غير اي صدقة حتى لو مش حناكل اليوم ده.. وبكد حنلاقي بركة في دخلنا غير عادية.. فهمتي يا حبيبتي ؟
رديت بانبهار وسعادة بالغة: ياخبر ايه الفكرة الروعة دي؟ جبتها منين دي؟
عمر: يعني موافقة ؟.. طيب نيجي للهدية التانية.. شوفي يا حبيبة قلبي.. ده مصحف مجزء ل30 جزء.. حتيجي على الدرجين بتوع البوفيه وترمي كل الكوارث اللي فيهم وتفضّيهم خالص وتحطي أجزاء المصحف في الدرج اليمين.. وكل يوم انا وانتي كل واحد منا ياخد جزء محدد ويقراه.. ولما يخلصه سواء في يوم او كذا يوم يحطه في الدرج الشمال وياخد جزء جديد وهكذا لحد ما الدرج الشمال يتملي خالص نعرف ان انا وانتي ختمنا المصحف مرة.. وبعد كده نرجعه تاني للدرج اليمين وهكذا على طول.. ايه رأيك ؟
أنا: بجد مش عارفة أرد وأقول ايه غير اني أشكر ربنا انه أهداني بيك
عمر: بصي يا سارة الحب مش بيستمر بين الزوجين بالكلام الحلو ولا بالفلوس ولا حتى بالأولاد.. لكن بيستمر بطاعة ربنا وبركته لهم.. واحنا عاوزين بيتنا ده بيت طائع لله علشان ربنا يبارك لنا في حياتنا واولادنا اللي جايين ان شاء الله
أنا: ربنا يكرمك ويخليك لي يارب وتفضل كده على طول
عمر: ياااااااااااه ده انا كده ح اتأخر على الصلاة.. يالاّ بقى مع السلامة.. على فكرة ح اخرج مع اصحابي شوية بعد الصلاة وح ارجع على الغداء
أنا: طيب ما تنساش تدعيلي .......مع السلامة
*********
خرج حبيبي وانا اودعه وأشكر الله على ان أهداني هذا الزوج.. ثم توضئت وصليت الظهر وجلست أقرأ سورة الكهف ووعدت نفسي الاّ أقطعها ابدا في اي يوم جمعة
ثم اخرجت محتويات درجين البوفيه ورصيت بالدرج الايمن كل الاجزاء وبدأت بأول جزء وسجّلت تاريخ هذه الختمة في ورقة صغيرة كي نعلم متى سننتهي منها.. ثم جلست أقرأ القران لفترة طويلة
.......
ثم قمت لتحضير الغداء والذي كان لحسن الحظ معونة انسانية من ماما بعد ما حكيت لها مأساتي مع الاكل وان ممكن اتطلّق وانا في شهر العسل من الكوارث اللي باعملها.. فالظاهر خافت اني ارجعلهم وهمّ ما صدقوا يخلصوا مني !!!! فطبخت لي كام صنف تحفة.. ربنا يخليكي لي يامشرفاني
*********
أريد ان يكون هذا اليوم جميلا لأكافيء عمر على هداياه الرائعة.. اعددت الغداء وجمّلت السفرة بورود ورششت معطر جو هاديء وبدلت ملابسي لأرتدي عباءة ناعمة وتركت شعري منسدلا على كتفي وتعطرت وطلبت عمر فأخبرني انه مع أصحابه.. طيب وبعدين ؟
رنيت عليه ثانية فلم يرد.. ارسلت له رسالة: تعالى بقى يا عمر.. انت اتأخرت اوي..برضه لم يرد
أرسلت رسالة ثانية: يا سيدي كفاية تقل.. بجد وحشتنا
لم يرد
فأرسلت له الضربة القاضية: خلاص يا حبيبي.. خليك براحتك بس شهرزاد كان نفسها تشوفك اوي.. خلاص بقى تدخل تنام أحسن
وطبعا كما توقعت جاء بعد دقائق معدودة...... وسكتت شهرزاد عن الكلام المباح تاااااااااااااااني

من طرف أبو علي الإثنين يونيو 02, 2008 1:25 pm

الحلقة الثامنة

قالت سارة
:
معقوووول مر شهرين على زواجي انا وعمر ؟
مروا بسرعة جدا.. حياة جديدة في المسئولية والمشاركة والمشاعر.. في كل شيء.. حتى اصدقائي اللي كنت بارغي معاهم بالساعات في التليفون اصبحت لا اراهم الا نادرا ولو تكلمنا في التليفون يكون حديث سريع لألحق كل الأشغال اللي ورايا
وشقتي الجديدة أصبحت مملكتي بجد وبعد ما كنت أنظف حجرتي في بيت ماما بالعافية وبعد استدعاء البوليس.. أصبحت لا أطيق ان اري منزلي غير مرتب وأتخانق مع عمر لو رمي ملابسه او كتبه كالمعتاد.. رغم ان كتبي واشيائي الخاصة زمان كانت محتاجة خريطة للوصول لها !!! لكنه هو الحب الذي يجمعك بمكان تشعرين انه ملكك وحدك تكونين فيه على راحتك وتفعلين ما تشاءين
حتى ان منزل والدي اضطررت ان ابيت فيه ليلة عندما مرضت أمي.. بجد لم أستطع النوم مش عارفة ازاي مش هو نفسه السرير اللي نمت عليه اكثر من عشرين سنة ؟ احساس لا يعلم تفسيره الا الله الذي يريد لنا ان نعمر بيوتا وبيوتا حتى نعمر الارض جميعا
وانا وعمر ومتفاهمين جدا لكن لا يخلو الأمر من غلاسة وتحكم في أشياء تافهة كي يثبت لنفسه انه سي السيد ولاأعلق عليها وأجعلها تمر كي لا تصبح كارثة.. شيء واحد هو ما يحيرني ويضايقني فعلا باستثناء حماتي طبعا !!.. وهو مصاريف البيت لا أعرف ماذا يمكن ان يفعل شابين يعملان عمل شاق يوميا كي يوفرا مصاريف الايجار والاكل والدواء والخروج والمجاملات الخ الخ الخ ... ؟
طبعا يحتاجان معجزة من السماء كي تحل لهم لغز الاسعار.. وأصبحت بعد ان كنت أصرف مرتبي على العطور والكريمات والمجلات.. أصبحت أبحث 10 ساعات قبل ان اشتري زيت الطعام كي أعرف اي نوع أوفر؟.. وأصبحت أفاصل مع اي بائع رغم اني كنت باقول لماما دايما ان ده تصرف بيئة !!! وأصبحت أحمل هم اي مناسبة غير معمول حسابها مثل فرح او خلافه نضطر اسفين ان نجامل اصحاب المناسبة فيه لأن ده معناه ان بقية الشهر ح نقضيه تونة وجبنة
ولكن ليس هذا ما يضايقني فقط ولكن تصرف عمر الغريب تجاه مصروف البيت هو ما يضايقني جدا.. وهو انه لا يخصص مبلغ معين لمصروف البيت وانا اساعده فيه ونصرف منه سويا.. لا.. هو يدفع الايجار وبعض الاشياء الاخري وانا عندما أقبض مرتبي أسارع لأنفقه كله تقريبا على خزين المنزل من سكر وزيت وخضار ولحوم وخلافه وهو متقبل ده عادي وبدون مشاكل.. حتى اني طلبت منه مرة مبلغ كي أشتري شيء للمنزل فرد على ببساطة: ما انتي معاكي فلوس يا سارة !! هي خلصت ؟
طبعا اتضايقت جدا من رد فعله ده.. هل المفروض ان أنهي مرتبي كاملا ثم بعد هذا هو يساعد !!! الغريب في الأمر انه غير بخيل ابدا بل بالعكس لا ينفق على نفسه تقريبا الا الضروري جدا ولكن ما يضايقني انه معتبر مساعدتي في المنزل امر مفروغ منه وفرض عليّ.. وتحملت هذا الامر رغم ضيقي منه انا احب ان أصرف على منزلي ولكن بارادتي وليس فرضا على حتى جاء يوما رجعت من العمل وانتظرته بعد الغداء وقلت له: شفت يا عمر النهاردة بعد الشغل نزلت انا وواحدة صاحبتي المحلات اللي جنب شغلي كانت عاوزة تشتري شوية حاجات
قال: طيب يا حبيبتي وايه المشكلة ؟
أنا: لا أبدا لقيت شنطة تحفة نازلة في التخفيض من 70 جنية الى 50 بس واشتريتها على طول.. تتصور دي جلد طبيعي
فرد بعصبية: اشتريتيها ؟ وما قلتيش لي ليه قبل ما تشتريها ؟
فاستغربت من رد فعله وقلت: عادي يعني يا عمر يعني ح اطلبك أقول لك على حاجة هايفة كده ؟
قال: خمسين جنية حاجة هايفة ؟
أنا: يعني انت زعلان من المبلغ ولا من اني ما قلتش لك ؟
عمر: الاتنين .. كان لازم تستأذني مني الاول
فرددت عليه وقد بدأ صوتي يعلو: عمر انت بتقول ايه؟.. دي فلوسي..انا ما خدتش منك حاجة علشان الزعل ده كله
فصرخ بغضب: فلوسك يعني ايه فلوسك ؟ يعني أخرس انا ولا ايه ؟
أنا: انا ماقلتش كده.. بس ازاي يعني استأذن قبل ما اصرف اي حاجة؟
عمر: انا ياستي معقد نفسيا خلاص؟ مش باحب ان مراتي تمسك فلوس وتزعق في وتقول فلوسي ومالكش دعوة والكلام ده
أنا: ياسلام.. واشمعني الكلام ده مش بيتقال لما باجيب حاجة للبيت.. ليه مش بتقولي استأذني؟ ولا علشان دي حاجة لي انا ؟
عمر: دي ضروريات للبيت مش ممكن نستغنى عنها.. انما الشنطة بتاعتك دلع
أنا: والله ادلع نفسي مش مشكلة.. وبعدين الضروريات دي مسئوليتك انت وانا ان كنت باساعد في البيت ده مش فرض عليّ
قال بعصبية: والله انا قلت من ايام الخطوبة تسيبي الشغل علشان وجع الدماغ ده وانتي ما سمعتيش الكلام.. واللي كنت خايف منه حصل.. بقيتي بتعلى صوتك عليّ وتقولي فلوسي انا
أنا: هو انت يا تحبسني في البيت يا تتحكم في كل مليم؟ ده انت فعلا معقد على كده
انتفض من مكانه والغضب يتطاير من عينيه وأمسك ذراعي بعنف وصرخ في: انا معقد؟!!!...طيب انا ح اوريكي العقد اللي بجد من بكرة مفيش شغل ولما أشوف كلامي ح يمشي ولا لأ ؟
ارتعبت من نبرته المخيفة وضغطه الرهيب على ذراعي والقسوة التي يتحدث بها فارتجفت وانهمرت دموعي بلا توقف
فلانت نبرته قليلا وزفر بقوة وقال: طيب بتعيطي ليه دلوقتي مانتي كمان زعقتي وجننتيني
أنا: ............ .....؟؟
عمر: كده ياسارة توصلي حاجة هايفة لحد كده ؟ خلاص بقي حقك على ما تزعليش
فرددت من بين دموعي: لا مش حاجة هايفة.. ده ربنا قال ذمة مالية منفصلة للمرأة تيجي انت وتقولي استأذن ؟
عمر: والله انا عارف ده بس مش قادر أطبقه.. ماأقدرش استحمل ان مراتي تقولي دي فلوسي وانت مالكش لازمة.. طيب اعمل ايه ؟
أنا: مااعرفش والله تعمل ايه ؟
عمر: طيب انتي شايفة اني بخيل ولاّ باصرف على نفسي حاجة؟ ولا انتي بتطلبي مني حاجة ومش باجيبها ؟
فرددت وانا امسح دموعي: لأ .. امّال ايه الفيلم ده طيب ؟
قال: انا يا ستي ما بحبش الست اللي بتعمل كده.. وبعدين انا مش عاوزك تدفعي حاجة في البيت تاني علشان مش كل شوية تقولي باساعدك باساعدك
قلت: بقي انا باعمل كده الله يسامحك.. وبعدين هو انتي يعني أحسن من الرسول عليه الصلاة والسلام اللي كان بيتاجر للسيدة خديجة في مالها وهي زوجته ولا يخجل من ان يعلن ان ده مال زوجته وفين ؟ في قريش عز التعصب والجهل؟
عمر: ياستي انا مااقدرش اوصل للمنزلة دي.. ولو الموضوع ده ح يجيب مشاكل ح اقعدك من الشغل فعلا
أنا: من فضلك يا عمر ما تكبرش الموضوع كده..انا فعلا زعلانة منك جدا ومستغربة تفكيرك جدا
عمر: حقك على اني انفعلت عليكي انتي عارفة قد ايه بحبك.. لكن مش ح اقبل ابدا اني اكون على الرف او حاجة تحصل في بيتي من غير موافقتي حتى ولو حاجة هايفة ؟
أنا: ............ ....؟؟
*********
مرّت أيام وانا وعمر متخاصمين.. يعني بنتكلم في الضروريات بس.. لكن من جوايا انا زعلانة منه جدا.. من عصبيته وموقفه الغريب وتفكير الأغرب.. المشكلة اني متأكدة انه مش بخيل ولا طمعان فيّ.. بس مش قادرة أفسر تفكيره لحد دلوقتي.. تحكم والسلام؟.. ولاّ خوف من الفلوس انها تقويني فأبعد عنه ؟!! وكأن اللي رابط أي زوجة بزوجها هي انه بيصرف عليها فقط .. ولو هيّ معاها فلوس حتقدر تعيش من غيره وتسيبه بسهولة !! بجد حاجة تجنن !! طيب وستات البيوت بيتطلّقوا ليه لما هي الحكاية كده.. مش معقول التفكير المقلوب ده ؟
عمر حاول يصالحني لكني لم أستطع ابدا.. لأني حاسة ان الصورة اللي كانت في خيالى اتهزت لأن موضوع الفلوس بين الزوجين ده حساس جدا ودايما الزوجة بتكون راسمة لزوجها وحبيبها صورة الفارس النبيل الذي لا يتكلم قط في المال لأن ده شيء بينقص من قدره كرجل ودائما تدور في عقلي عبارة الافلام الشهيرة : انا برضه أمد ايدي لفلوس واحدة ست ؟؟؟.. فأصبح الأمر مقترن بالرجولة في نظري
ولكن ظروف المعيشة البشعة الان غيرت من شكل الصورة وجعلت الرجل مضطرا لعمل زوجته ومساعدتها له والزوجة ايضا تقبلت هذا و تسعد عندما تفعله.. ولكن للأسف لم يتخل الرجل عن الصورة القديمة في خياله بأنه صاحب المال والآمر الناهي الأوحد..فأصبح يعذب زوجته بحملين حمل المشاركة وحمل التحكم
*********
قال عمر
:
سارة وحشة أوي وهي زعلانة.. صحيح هي لم تقصر في أي حق من حقوقي في البيت وأجد طعامي وملابسي وكل شيء مرتب وترد عليّ عندما أسألها عن أي شيء.. ولكن روحها المرحة الدافئة والحيوية التي تنطق من عينيها والتي تجعلني أذوب فيها اختفت !! وحل محلها لوح زجاج بارد لا يعبر عن أي شيء
حاولت مصالحتها بلا جدوي.. ياربي أعمل ايه ؟ بس أنا كمان مش قادر أنفذ اللي هي عاوزاه !! يعني ايه أكون قاعد في البيت ألاقيها داخلة وشارية غسالة مثلا وتقولي وانت مالك دي فلوسي أقعد كمل الشاي اللي بتشربه وخليك في حالك
معقول أستحمل كده؟ ولو كنت فوّت حكاية الشنطة كان حيبقي ده العادي.. انا مش طمعان في فلوسها ابدا لكني مضطر لمساعدتها في البيت علشان ما نزورش السيدة انا وهي كل يوم جمعة
بس أعمل ايه.. تحت هدومي الكاجوال لسه فيه صديري جدي الصعيدي.. مش قادر اتقبل الموضوع خالص..وهيّ كمان معذورة وشكلي وحش قدامها.. برضه انا انفعلت بصورة غبية !! ومش قادر أعيش من غير دفء عينيها وحنيتها.. طيب ما هي مش عاوزة تصالحني ..أعمل ايه؟؟..شغّل التفانين يا واد يا عمر دي سارة حبيبتك
*********
قالت سارة
:
ذهبت الى عملي كالمعتاد وانا ماليش نفس لأي حاجة في الدنيا وطبعا كان باين على وشي جدا فكل واحدة ظريفة تيجي تسألني بحشرية: ايه ابتدينا نكد الجواز ولا ايه ؟؟؟ قلنا كده قالوا اطلعوا من البلد
انا مش عارفة كل واحد ما بيحطش لسانه جوة بقه ليه؟.. ياسااااتر
خلاص الساعة 2 كلها ساعة واروّح..موبايلي بيرن.. ايه ده ؟ ده عمر.. خير ؟
أنا: الو ايوة يا عمر ؟
فرد بصوت أقلقني: ايوة يا سارة ازيك يا حبيبتي انتي كويسة ؟
قلت: الحمد لله فيه ايه ياعمر ؟
عمر: مفيش حاجة بس ح اعدي عليكي بعد ساعة استأذنت من شغلي بدري وح اجيلك استنيني
أنا: ايه فيه ايه؟.. انت رعبتني كده ؟
فرد بغموض: لما اجي ح تعرفي !! مع السلامة

يارب سترك يارب دي اول مرة يعملها.. أكيد بابا تعب وهو مش عاوز يقول لي.. ولا ماما ؟!! لا بجد حرام كده.. حاولت الاتصال به الف مرة بلا جدوى.. لا يرد مما أكد شكي بأن مصيبة قد حصلت.. يارب استر يارب
وأخييييييييييييييرا جاء بعد ما أصبحت على وشك الانهيار.. ولكني وجدته في قمة الشياكة مرتديا القميص المفضل عندي وكمان البرفان اللي باموت فيه!! ايه ده ؟ طبعا لو كانت والدته هي اللي تعبانة كان جه بالبيجاما !!! لا وكمان رايق وعمّال يسلم على زمايلي ويوصيهم عليّ !! لا بجد.. لو ما قالش فيه ايه ح اخبطه بحاجة في دماغه حالا
وأخيرا سلم عليّ بحرارة وهمس في أذني: وحشتيني.. وأخذني وانصرفنا وزميلاتي لسان حالهن يقول: جتنا نيلة في حظنا الهباب
وفي السيارة كان ح يغمي على من شدة القلق وسألته: أبوس ايدك قولي فيه ايه انا خلاص ح اموت.. ماما ولا بابا اللي تعبانين ؟
فرد بلهجة المحقق كونان: اطمني هم بخير انا واخدك لمشوار مهم جدا وما تسأليش على أي حاجة دلوقتي لحد ما نوصل
فخف قلقي قليلا وان لم يختفي تماما .. ولكني راقبت ملامح الغموض المرسومة على وجهه وهي ممزوجة بوسامته الظاهرة اليوم.. فلاحظ اني أراقبه فسألني: ايه وحشتك ؟.. فلم أرد ومديت البوذ المتين.. وأغمضت عيني ولكني رأيت صورته مازالت مرسومة بداخلها
ياه الظاهر اني نمت شوية.. ايه ده.. انا فين ؟ في الجنة ؟ وأفقت لأجد القاهرة كلها تحت مستوى قدمي في منظر خلاب وجو رائع ونسيم يداعب المشاعر.. وعمر ينظر لي بحنان ويقول لي: صح النوم.. يالاّ انزلي بسرعة
سألته: ايه ده احنا فين ؟
رد قائلاً: في المقطم يا حبيبتي مش كان نفسك تشوفيه من زمان ؟
قلت: هو ده المشوار المهم ؟ ؟ ح نعمل ايه هنا ؟
قال: هشششششششش كفاية أسئلة وتعالي
ومشيت وراءه وانا أبعد يده التي تحاول الامساك بيدي والبوز مازال موجودا
ودخلنا الى كافيتريا لم أري في جمالها من قبل.. كل حوائطها مستبدلة بزجاج دائري كي تري القاهرة من كل أركانها وكل الأضواء استبدلت بشموع تعطي الجو رومانسية وسحر غامض.. واخذني الى طاولة بعيدة وجلسنا وانا لا استطيع النطق بعد ما رأيته.. ونظر الى عيني مباشرة وقال لي ثانية: وحشتيني
أنا: ............ ..؟
عمر: بحبك
أنا: ........؟
عمر: مش عاوزة تردي عليّ ؟ طيب انا اسف
أنا: خلاص يا عمر انا مش زعلانة انا نسيت الموضوع خلاص
قال: واضح جدا بدليل البرود اللي بتعامليني بيه.. ياريتك خاصمتيني لكن انتي استعملتي اسلوب ذكي جدا ما قصرتيش في اي حاجة ولما اكلمك بتردي عادي لكن انتي في دنيا وانا في دنيا تانية.. ودي حاجة ممكن تموتني .. فين سارة حبيبتي ؟
قلت: ايوة حبيبتك اوي.. بدليل انك مش عاوزني أشتري لنفسي حاجة ولازم أرفع صباعي وأستأذن قبل ما أشتري حاجة
قال: يا حبيبتي انا نفسي أجيب لك كنوز الدنيا وأحطهم تحت رجليكي.. بس انتي عارفة الظروف.. وانا مش عاوز اتحكم فيكي ولا حاجة.. دي حاجة نفسية جوايا بتخليني عاوز أعرف كل حاجة بتعمليها وتحسسيني انك مش بتعملي حاجة الا لما أعرفها الاول
قلت: بس دي حاجة تخنق
قال: بصي يا سارة انا بخيل ؟
رديت: لا
قال: عيني زايغة ؟
رديت: لا
قال: بأعامل أهلك وحش ؟
رديت: لا
قال: باعاملك انتي وحش قدام الناس او حتى بيننا ؟
رديت برضه: لا
قال: مش عارف ربنا كويس ؟
قلت: الحمد لله
قال: طيب يا ستي اعتبري موضوع الفلوس ده عيب فيّ.. وخديني على قد عقلي فيه وريحيني.. وانا اوعدك اني عمري ما ح احرمك من حاجة ابدا بس عرّفيني الاول.. اتفقنا ؟
انكسفت جدا من اني أريده كاملا بلا عيوب من تكبيري الموضوع بالشكل ده
ورددت عليه: اتفقنا ياحبيبي
قال وابتسامة فرحة تملأ وجهه: الله أكبر أول مرة تنطقيها من أسبوع.. أيوة كده خلي الشمس تطلع يا شيخة
قلت: خلاص بقى.. فرجت علينا الناس
قال: طيب غمضي عينكي انا جيب لك هدية بس ما تتعوديش على كده أحسن ح نشحت بالشكل ده !! اتفضلي يا ستي
فتحت العلبة التي قدمها.. وهتفت: الله ايه الصندل الجميل ده ؟
قال: ده يا ستي علشان يليق على الشنطة اللي اشتريتيها.. بس زي ما اتفقنا ح تعرفيني الاول على اي حاجة خلاص يا حبيبتي ؟
رددت بكسوف: خلاص يا شهريار
فرد بلهفة: شهريار؟!!! الله أكبر
ثم نظر لي وقال: سارة انتي لازمك الغدا هنا أوي؟.. ولاّ ممكن نروّح دلوقتي ؟

من طرف gareeb الأربعاء يونيو 04, 2008 1:42 pm

أبوعلي ..
شكراً لك ..
وأنتظر بفارغ الصبر ..
الحلقات الأخرى ..

وحرض العزاب على الزواج ... يوميات عروس ...(1)

وحرض العزاب على الزواج ... يوميات عروس ...(1)

نعم يا أبا علي نِعم التحريض هذا!!

السلام عليكم ...

وشو فداغيه بس!!

هههههههههههههههههههههه

إثارة من نوع خاص ...!!!

ياشين اللي ينقل وهو ما قرأ!!

اعتذر ....!!

رد: وحرض العزاب على الزواج ... يوميات عروس ...(1)

جمييييييييييييييييييييل

رد: وحرض العزاب على الزواج ... يوميات عروس ...(1)

رد: وحرض العزاب على الزواج ... يوميات عروس ...(1)

تباً لكم يا أعداء المرأة

رد: وحرض العزاب على الزواج ... يوميات عروس ...(1)

السلام عليكم ...

لا وثلاث مرات بعد!!

رد: وحرض العزاب على الزواج ... يوميات عروس ...(1)

ما شاء الله ..

رد: وحرض العزاب على الزواج ... يوميات عروس ...(1)

السلام عليكم ...

رد: وحرض العزاب على الزواج ... يوميات عروس ...(1)

رد: وحرض العزاب على الزواج ... يوميات عروس ...(1)

السلام عليكم ...